Myeni na mbilaelo kha Ouaddou malugana na Pirates

Mutambi wa kale wa Orlando Pirates, Vho-Sifiso Myeni vho bvisela khagala mbilaelo dzavho malugana na ndila ine mugudisi Vho-Abdeslam Ouaddou vha amba ngayo na vhatambi vhavho.

Myeni uri zwe Ouaddou a amba nga murahu ha u tamba 1-1 na AmaZulu FC zwi nga rumela mulaedza u si wavhuḓi kha thimu.

Mugudisi o sasaladza vhanwe vha vhatambi vhawe, vhari vha tea u “vuwa” nga murahu ha u kundelwa u wina mutambo.

Myeni u tenda uri ho vha hu na nḓila ya khwine ye Ouaddou a nga fhirisela ngayo mulaedza wawe.

“Ndi khou vhilaedziswa nyana nga maipfi a coach nga murahu ha mutambo, nga maanda zwe a amba phanda ha dzi camera” ndi Myeni.

Sifiso Myeni uri Abdeslam Ouaddou o vha o tea u amba na vhatambi kamarani ya u ambara nṱhani ha u amba nga ha fhungo iḽi khagala.

Uri zwe mugudisi a amba zwo mu sia e na mbudziso dzi sa fhindulei.

“Ndo sala ndi na mbudziso.. Mugudisi u kha di toda u vha kha thimu naa?

Naa u khou ṱoḓa u ṱuwa? Kana o dinalea nga u ralo?,” Myeni o vhudzisa.

Myeni o dovha a bvukulula uri hu nga vha na zwithu zwine zwa khou itea murahu ha zwiṱori zwine tshitshavha tsha sa zwi ḓivhe.

• VHALANI HAFHU: Royal Heritage Family Fest i dzhena kha tshifhinga tshiswa

U amba uri arali mugudisi a sasaladza vhatambi khagala, zwenezwo zwi nga ita uri hu vhe na u sa anḓana nga ngomu ha thimu.