Mme o pomokwaho u shelela vhana vhawe mushonga o wanala o tea u senga

Mme ane a khou pomokwa u ṋea vhana vhawe vhavhili vha vhatukana mushonga o litsha khumbelo yawe ya beili khothe ya madzhisiṱaraṱa ya Tshilwavhusiku.

Khothe yo hana khumbelo ya u sedzwa muhumbuloni, ya vhona uri o tea u sengiswa, nahone mulandu wo fhiriselwa phanḓa u swika nga ḽa 28 Ṱhangule. 

Vhana vhavhili, Akonaho Siphugu na Otewa Thenjeni , vho lovha nga ṅwambo wa u humbulelwa ha u shelelwa musonga.

Mme wa minwaha ya 27 ane a khou pomokwa u vhulaha vhana vhawe vhavhili vha vhatukana, 

O litsha khumbelo yawe ya beili musi a tshi ḓivhonadza khothe ya Madzhisiṱaraṱa wa Tshilwavhusiku nga Ḽavhuṋa, ḽa 12 Fulwi. 

Mapholisa vho vha vha tshi dzula vhe hone nga maanḓa nahone mathomoni vho vha vha tshi tendela mashaka na vharangaphanḓa vha tshitshavha fhedzi u dzhena khothe nga ṅwambo wa tshikhala tshiṱuku.

Musi tsengo i tshi khou bvela phanḓa, mutshutshisi wa tshitshavha o humbela uri miṋango i vulwe u itela uri miraḓo minzhi ya tshitshavha i kone u ṱalela tsengo.

Vhadzulapo vha maḓana vho vha vho kuvhangana nnḓa ha khothe u itela u tevhela mulandu.

Musi hu tshi khou thetsheleswa mulandu, mutshutshisi o humbela uri muhumbulelwa a rumelwe uri a ṱolisiswe muhumbuloni wawe.

Muimeleli wawe wa mulayo o hanedza yeneyo khumbelo. Nga murahu ha u vhudzisesa muhumbulelwa, madzhisiṱaraṱa o dzhia tsheo ya uri o tea u sengiswa nahone a landula khumbelo ya u sedzwa muhumbuloni wawe.

• VHALANI HAFHU : Zanele Potelwana u ṱuṱuwedza vhaswa nga Milaedza ya maanḓa

Mulandu wo fhiriselwa phanḓa nga ḽa 28 Ṱhangule u itela u bvela phanḓa na ṱhoḓisiso.