Royal Heritage Family Fest i dzhena kha tshifhinga tshiswa
Phalaphala FM Royal Heritage Family Fest i khou shanduka ya vha mushumo wa masiari ṋaṅwaha,
U bva nga ḽa dzi 24-26 khubvumedzi, u itela u ṱuṱuwedza vhupo ho tsireledzeaho, vhune ha vha na vhushaka na miṱa.
Vhuṱambo ha mvelele ha maḓuvha mararu hu katelaho miṅwaha yoṱhe
Phalaphala FM Royal Heritage Family Fest i khou dzhena kha ndima ntswa ṋaṅwaha, hune vhadzudzanyi vha fhirisela mishumo yoṱhe ya vhuṱambo kha masiari lwa u tou thoma u bva tshe mushumo uyu wa thomiwa miṅwaha i fhiraho fumi yo fhiraho.
Vhuṱambo uhu, he ha vha vhu tshi ḓivhiwa sa Royal Heritage Festival, vhu ḓo vha hone u bva nga ḽa 24 u swika nga ḽa 26 khubvumedzi , vhu tshi ṱanganya miṱa na zwitshavha lwa maḓuvha mararu a mvelele, vhuḓimvumvusi na vhuṱambo ha vhufa.
Mudzudzanyi wa mushumo Vho Mbalavhali Divhambele vhari tsheo ya u dzudzanya mishumo yothe nga masiari yo vha yo sedza kha u sika vhupo ho tsireledzeaho na vhune ha vha na vhushaka na miṱa.
“Ri khou toda miṱa i tshi ṱangana, ya ḓiphina na u pembelela vhufa hayo fhethu ho tsireledzeaho na u ṱanganedza.Ri khou ita zwithu nga nḓila yo fhambanaho nga hetshi tshifhinga,” ho amba Vho-Divhambele.
Vhuṱambo vhu ḓo thoma nga dzi 24 khubvumedzi nga Phalaphala FM Royal Gospel Family Day, hune muimbi wa kale wa muzika wa gospel Sipho “Big Fish” Makhabane a ḓo vha vhukati ha vhatambi .
Hezwi zwi ḓo tevhelwa nga Royal Learners’ Cultural Day nga dzi 25 khubvumedzi, hune murendi wa dzitshaka Vendaboy Poet a ḓo ranga phanḓa mbekanyamushumo.
Vhuṱambo vhu ḓo swika magumoni nga e Phalaphala FM Royal Heritage Family Day nga dzi 26 khubvumedzi, hune Makhadzi a ḓo takadza vhafuni.
Miṱa i nga lavhelela u ḓimvumvusa, u sumbedza mvelele, fhethu ha u ita picnic na braai, kiddies’ rides, mascots, u penda tshifhaṱuwo, ṱano na vharengisi.
- VHALANI HAFHU: Cardoso o bvisela khagala mbilaelo dzawe phanḓa ha Chiefs
Phalaphala FM Royal Heritage yo thomiwa nga 2012 nahone yo no aluwa ya vha tshiṅwe tsha zwiitea zwihulwane zwa mvelele na muzika wa Limpopo .