Broos o imelela tshiṱirathedzhi tsho kundelwaho, a ri: “Tsho shuma”

Mugudisi wa Bafana Bafana Vho-Hugo Broos vha vhonala vha sa khou disola nga tshiṱirathedzhi tshavho tsho ḓisaho khanedzano musi tshigwada tshavho tsho kundwa nga Mexico nga 2-0 kha mutambo wavho wa u thoma wa Tshiphuga tsha Ḽifhasi.

Mugudisi wa Belgium o sia vhanzhi vho mangala musi a tshi thoma mutambo a tshi shumisa sisiṱeme i songo ḓoweleaho ya 3-5-2.

Vhanzhi vha tenda uri zwenezwi ndi zwone zwo ṋeaho Mexico tshibuli tsha u langa mutambo.

Fhedzi naho vho kundwa na u xelelwa nga vhatambi vhavhili vhe vha wana khadi tswuku, Hugo Broos o ombedzela uri tshiṱirathedzhi tshawe a si vhukhakhi.

“Ndi vhona unga arali no vhona mutambo, no vhona uri ndi ngani ro tamba nga yeneyo nḓila,” Broos o ralo.

“Nga nnḓa ha mimunithi ya 15 ya u thoma musi Mexico yo ri vhea fhasi ha mutsiko muhulwane, mutambo wo vha wo linganela zwavhuḓi.

“Vho vha vho no fhelelwa nga zwiṱirathedzhi zwa uri vha ite mini nga bola. Vhatambi vhavho vho vha zwi tshi khou sokou mona-mona bola zwi si na khombo.”

Mugudisi o amba uri zwenezwo fhedzi ndi phindulo kha vhoṱhe vhane vha sasaladza u thoma hawe kha mutambo.

Fhedzi thaidzo dza Bafana dzo vha dzi si dza u kundwa fhedzi.

Thimu i do tangana na mutambo wa ndeme na Czechia vhege i daho hu si na Sphephelo Sithole na Themba Zwane, vhothe vho wana  khadi tswuku.

• VHALANI HAFHU : Celeste Ntuli o livhuha goloi yawe ntswa

Zwino mutsiko wo no ṋaṋa kha Hugo Broos sa izwi Bafana Bafana i tshi khou kombetshedzea u wana mvelelo yavhuḓi kha mutambo u tevhelaho.