Hlungwani o ṋea ngeletshedzo i vhavhaho kha vho malugwane

Malugwane wa kale wa PSL Vho-Victor Hlungwani vho sumbedza mbilaelo nga ha nḓila ine vhomalugwane vho ḓo shuma ngayo u bva mathomoni a Betway Premiership.

Hlungwani uri ho vha na vhukhakhi vhu soliseaho kha mitambo ya u vula ya khalanwaha.

Fhedzi-ha, u tenda uri vhukhakhi uhu vhu nga vha tshithu tshavhuḓi arali ha thusa u lugisa thaidzo hu tshee nga phanḓa.

“Ho vha hu si mathomo avhuḓi, fhedzi khamusi ndi khwine arali ra vhona vhukhakhi uhu hu tshee nga phanḓa uri vhu kone u lugiswa,” ho amba Hlungwani.

Vho vha vha tshi khou amba kha mbekanyamushumo ya Sport On kha Radio 2000 nga Ḽavhuṋa nga madekwana musi vha tshi vhidzwa uri vha ambe nga ha vhomalugwane.

Vho dovha vha bvisela khagala zwiwo zwivhili zwine vha ri zwo itea kha mutambo wa TS Galaxy na Mamelodi Sundowns.

Hlungwani uri ho vha na zwikoro zwivhili kha mutambo zwe zwa vhonala zwi tshi nga zwo vha zwi tshi nga dzheniswa nga vhatambi vhe vha vha vhe fhethu hu songo teaho.

Hezwi zwo dovha zwa vusa nyambedzano nga ha ṱhoḓea ya u shumiswa ha Video Assistant Referee (VAR) kha bola ya milenzhe ya Afrika Tshipembe.

Victor Hlungwani u na fulufhelo ḽa uri vhugudisi ha VAR vhu nga thoma musi khalanwaha i sa athu fhela u itela uri vhu kone u shuma nga khalanwaha i ḓaho .

• VHALANI HAFHU: Myeni na mbilaelo kha Ouaddou malugana na Pirates

U shumiswa ha VAR zwi nga thusa vharefiri u dzhia tsheo dza ndeme, nga maanḓa kha zwikoro, dzi penalty na khadi tswuku.