Mzansi Youth Choir yo ṱalusa u imba na Tyla sa zwi takadzaho

The Mzansi Youth Choir yo ṱalusa u imba na mutsila we a wina Grammy Tyla kha vhuṱambo ha u vula ha Tshiphuga tsha Ḽifhasi tsha FIFA sa tshenzhemo ya luthihi kha vhutshilo.

Khwairi yo ṱanganela na Tyla kha u imba Luimbo lwa Lushaka lwa Afrika Tshipembe phanḓa ha mutambo wa u vula wa Afrika Tshipembe na Mexico, phanḓa ha tshitediamu tsho ḓalaho na vhaṱaleli vha dzimiḽioni ḽifhasini ḽoṱhe.

Murado wa khwairi Vho-Zoliswa Gulwa vhari tshigwada tshopfa uri vha do vha vha tshi khou imba na Tyla musi vha tshi khou ya vhukavhamabufho.

O ṱalusa u ṱangana na muimbi sa zwi takadzaho nahone a amba uri zwo pfala sa vhunga vho no mu ḓivha lwa miṅwaha.

Khwairi yo dzhia u rambiwa sa khuliso khulwane na tshiga tsha uri mushumo wavho wo khwaṱhaho u khou dzhielwa nṱha kha vhuimo ha dzitshaka.

Vho-Linda Mlimi vhari ndeme ya vhuṱambo yo thoma u pfala musi khwairi i tshi tshimbila i tshi dzhena mudavhini.

U imba luimbo lwa lushaka phanḓa ha mutambo wa Tshiphuga tsha Ḽifhasi zwo vha zwi tshifhinga tshi sa hangwei, nahone tshigwada tsho ḓipfa tshi tshi ḓihudza nga u imela Afrika Tshipembe ngeno tshi tshi khou tikedza Bafana Bafana.

Lwendo lwa u ya Mexico lwo dovha lwa ita tshihumbudzo. Vho Keneilwe Melato vho sumbedzisa u vhona thimu ya lushaka tsini sa tshifhinga tsho khetheaho,

Ngeno Vho Tshegofatso Madibikanye vha tshi takalela u ṱangana na u ṱanganelana na vhathu vhapo. Vho-Simphiwe Nkosi vhari u wana uri vha do imba khathihi na Tyla zwo vha zwi tshi vha ṱuṱuwedza vhukuma.

• VHALANI HAFHU: Tyla u amba nga ha u imba luimbo lwa lushaka kha World Cup

Nga u angaredza, khwairi yo ṱalusa tshenzhemo sa ndugelo na tshifhinga tsha u ḓikukumusa kha tshigwada na shango.