Tshigwada tsha Belgium tshi bvisela khagala nomboro ine Mofokeng a do ambara

 Kiḽaba ya Belgium ya Royale Union Saint-Gilloise yo bvisela khagala nomboro ya jeresi ine Relebohile Mofokeng a ḓo i ambara musi a tshi thoma ndima ntswa kha mushumo wawe mashangoni a nnḓa.

Mutambi wa minwaha ya 22 u do ambara nomboro ya 38, ye a vha o i ambara musi a kha Orlando Pirates.

Nomboro yo no vha tshiga tsha Mofokeng, sa izwi o bvelela kha miṅwaha mivhili yo fhiraho kha Betway Premiership.

Kiḽaba ya Belgium yo dovha ya rumela mulaedza kha zwileludzi zwa vhudavhidzani, i tshi ḓivhadza vhatikedzi vhayo – nga maanḓa vhane vha vha Afrika Tshipembe – nga ha mutambi uyu.

“No ḓa Afrika Tshipembe nga ṅwambo wa zwenezwi?” ho ṅwala Royale Union Saint-Gilloise, i tshi dzumbulula jeresi i re na nomboro ya 38.

Izwi zwi khou da nga murahu ha musi tshigwada tsha Orlando Pirates tsho khwathisedza uri tsho swikelela thendelano na tshigwada tsha Belgium  u rengisa mutambi uyu.

Vha Royale Union Saint-Gilloise vha khou lavhelelwa u ḓivhadza lwa tshiofisi Relebohile Mofokeng sa mutambi wavho muswa kha maḓuvha a si gathi a tevhelaho.

Hezwi zwi do itea musi zwothe zwo no fhelela malugana na khonthiraka yawe na kilaba yawe ntswa.

• VHALANI HAFHU:Broos o khoda nyaluwo ya Mbokazi kha bola ya milenzhe 

Vhatikedzi vha do vha vho lindela nga maṱo matswuku u vhona arali mutambi uyu a tshi ḓo bvela phanḓa na u sumbedza vhukoni he ha mu ita muṅwe wa vhatambi vhaswa vhane vha dzhielwa nṱha vhukuma kha bola ya milenzhe ya Afrika Tshipembe.

Kha vha sedze vidio i re afho fhasi: