Maipfi a u thoma a Mofokeng nga murahu ha u saina na St-Gilloise
Tshigwada tsha Belgium tsha Royale Union Saint-Gilloise tsho ḓivhadza lwa tshiofisi Relebohile Mofokeng sa mutambi wavho muswa.
Mutambi wa minwaha ya 21 o saina thendelano ya minwaha miṋa, ine ya ḓo ita uri a dzule kha kilabu u swika vhukati ha 2030.
Thendelano i dovha ya ṋea tshigwada khetho ya u engedza thendelano lwa ṅwaha muthihi.
Mofokeng o swika Belgium nga murahu ha u tamba zwavhuḓi kha Orlando Pirates, he a vha e muṅwe wa vhatambi vha khwinesa vha tshigwada.
Musi a tshi amba nga murahu ha u saina thendelano yawe, Relebohile Mofokeng o amba uri o takala vhukuma uri o swikelela muloro wawe.
“Ndo takala vhukuma u vha fhano,” ṋaledzi ine ya khou bvelela yo vhudza tshigwada.
“Zwo vha zwi muloro wanga u tamba Europe nahone ndo lavhelela u thoma fulo ḽa u dzhena kha Champions League,” ho amba Mofokeng.
“Ṅwaha wo fhiraho wo vha wo khethea kha nṋe.Ndo wina ligi na Orlando Pirates, nda tamba khapi ya ḽifhasi ya u thoma na Bafana Bafana nahone zwino ndo dzhia ḽiṅwe ḽiga ḽihulwane kha mushumo wanga.
“Ndi fulufhela u bvela phanḓa na u aluwa sa mutambi fhano.
“Nṋe na thimu ri ḓo ita nga hune ra nga kona ngaho u lwela zwiphuga.”
Vhatikedzi vha Afrika Tshipembe vha ḓo vha na dzangalelo ḽa u vhona arali Relebohile Mofokeng a tshi ḓo bvela phanḓa na u penya musi a tshi thoma vhutshilo vhuswa kha iṅwe ya ligi dza nṱha dza Europa.