Zwitori zwa Dzata II

Vha Singo vho pfulutshela devhula vhukovhela ha Lwandali vha fhaṱa musanda muswa, Dzata II.

U swika na ṋamusi vhaḓuhulu vha Dimbanyika a vha tendelwi u sedzana na vhaḓuhulu vha Ṋetshiendeulu sa vhunga hu tshi tendiwa uri vhaḓuhulu vha Ṋetshiendeulu vha na maanḓa a fhiraho a mvelo o ṋewaho nga Dimbanyika.

 Musi Khosi Ṋetshiendeulu a tshi ya Dzanani u hulisa Khosi ya Mphephu-Ramabulana vhenevho vhavhili vha fanela u amba vha songo sedzana.

 Hu dovha havha hu na luvhondo lwo vha khethaho, nahone vhoṱhe vha fanela u amba vho furalela luvhondo lune lwa dzi fhandekanya.

 Heyi nḓowelo i dovha ya vhangwa nga lutendo lwa uri Khosi Dimbanyika na nwana wa Rambwapenga (Ṋetshiendeulu) vho vha vha sa koni u vhonana musi Dimbanyika o valeliwa bakoni, na musi a tshi khou bvisa ndaela.

Khosi ya Mphephu-Ramabulana na yone, nga zwenezwo, i fanela u ṋea ndaela kha Khosi Ṋetshiendeulu vhavhili vha sa vhoni tshifhaṱuwo tsha muṅwe.

Dimbanyika o tevhelwa nga Dyambeu. Tshaka dza Vhangoṋa dzo salaho, Vhambedzi na Vhalembethu vha Ha-Mutele na Makhahani (Thulamela) na vhone vho mbo ḓi kundwa.

Dyambeu o lovha musi a tshi khou lingedza u vhusa Vhatavhatsindi vha Tshiheni na Tshiavha (hune dzivha ḽa Fundudzi ḽa wanala hone).

 Dyambeu hu pfi o dzhiela fhasi Vhatavhatsindi a dzhia tsheo ya u vha vhusa hu si na u shumisa Ngomalungundu.

 Ene, nga zwenezwo, o laedza vhanna vha rathi vha Vhandalamo vhe vha hwala Ngomalungundu uri vha i vhee kha muri wa pulamu.

 Ngomalungundu hu pfi yo wa kha muri wa pulamu, ya kwama fhasi ya fhalala ngeno vha Singo vho farakanea nga u lwa na Vhatavhatsindi.

 Zwenezwo zwo ita uri Vhasingo vha kundwe nga Vhatavhatsindi, ngomalungundu yo kwasheaho ya dzhiiwa nga Vhatavhatsindi.

 Khosi Dyambeu vha vhulawa. Uhu ho vha u kundwa ha u thoma ha Vhasingo nga lushaka luṅwe na luṅwe lwa Vhavenḓa.

• vhalani hafhu: Zwitori zwa Dzata I

Vhatavhatsindi vho mbo di isa Ngomalungundu musanda wavho, Tshiheni.