Zwitori zwa Dzata I

Ṅwali o laedza vhotshifhe uri vha vhee muṅwe wa vharwa vha Tshikalange, Hwami , sa khosi ntswa.

Hwami o ranga phanḓa vhathu vhawe vha wela mulambo wa Vhembe vha dzula govhani ḽa Nzhelele.

Musanda wa Hwami yo vha i kha thavha ya Lwandali nahone yo vha i tshi ḓivhiwa sa Dzata (ine ya ḓivhiwa ṋamusi sa Dzata I).

 Hwami o vhusa vhunzhi ha tshaka dza Vhangona hu tshi katelwa na khosi yavho, Raphulu.

Hwami o vha, u ya nga ṱhalutshedzelo iyi, o tevhelwa nga Dimbanyika.

 Dimbanyika o vha e muzwimi. Ḽiṅwe ḓuvha o ya u zwima a si tsha vhuya.

Fhedzi mmbwa dzawe mbili dzo humela hayani.

Tshigwada tsha vhaṱoḓi, tsho rangwa phanḓa nga iṅwe ya mmbwa dzawe, tsho rumelwa nga ḓuvha ḽi tevhelaho u itela u mu ṱoḓa.

Mmbwa yo ranga phanḓa tshigwada tsha vhaṱoḓi vha ya bakoni.

Muvulo wa bako wo vha wo ḓala matombo mahulwane ane u nga si kone u a takula.

 Nga murahu ha musi vho lingedza u bvisa matombo vha sa kone, Dimbanyika o mbo ḓi amba navho

 A vha vhudza uri vha litshe u lingedza nahone bako ḽi ḓo vha vhiḓa ḽawe.

O vha laedza uri vha dzhie Ngomalungundu vha pfuluse musanda sa vhunga hu si na muthu ane a ḓo tendelwa u dzula thavhani ya Lwandali.

 O vha a tshi thivhela vhathu u ḽa mitshelo i bvaho Lwandali.

O dovha a ṋea ndaela dza uri murwa wa Rambwapenga na vhaḓuhulu vhawe vha fanela u sala thavhani ya Lwandali uri vha ṱhogomele vhiḓa ḽawe na u vha vhalindi vha Lwandali.

Lwandali ho mbo ḓi ḓivhiwa sa Tshiendeulu zwine zwa amba mavhiḓa a vhakololo.

 Murwa wa Rambwapenga na vhaḓuhulu vhawe vho mbo ḓi ḓivhiwa sa Netshiendeulu, zwine zwa amba muṋe/muvhusi/mulondoti wa Tshiendeulu.

Vhalani hafhu:Vha singo: Ubva Vhukalanga uya Venda

• Source: luode.co.za

• Translator : Nthaduleni Rolivhuwa