Ouaddou o khoḓa Sipho Chaine we a vunda rekhodo

 Mugudisi wa Orlando Pirates Vho-Abdeslam Ouaddou vho khoḓa mulindavhuno Sipho Chaine nga murahu ha musi vho vhea rekhodo ntswa ya PSL.

Sipho Chaine o vhea rekhodo ntswa ya PSL musi a tshi vhulunga clean sheet musi Pirates i tshi kunda Magesi FC nga 3-0.

Mutsireledzi wa tshipikwa wa minwaha ya 29 o vunda lwa tshiofisi rekhodo ya kale ya Ronwen Williams.

O dovha a fhira rekhodo ya kale ya kilabu ye ya vhewa nga muḓivhalea wa Pirates Moeneeb Josephs.

Sipho Chaine o no dzhia zwikoro zwa 12 fhedzi kha mitambo ya 28 ya ligi ino khalanwaha.

U tamba na Magesi hu si na zwikoro zwo dovha zwa thusa Pirates uri i dzule i na fulufhelo ḽa u dzhia tshiphuga tsha Betway Premiership.

Buccaneers i murahu ha Sundowns nga poindi tharu musi i na mutambo.

Nga murahu ha mutambo, Ouaddou ho ngo kona u dzumba u livhuwa hawe mulindavhuno wa tshigwada tsha Bafana Bafana.

Ouaddou o ri: “Ndi a ḓihudza ngae. “Sipho ndi munwe wa vhalindi vha khwine kha Afrika, hu si kha shango ili fhedzi.”

Mugudisi wa Pirates o dovha a khoḓa vhurangaphanḓa ha Chaine, a mu ṱalusa sa muṅwe wa vhakapuṱeni vha thimu mudavhini.

“U thusa thimu yashu nga maanda.U nga zwi vhona uri u na tshenzhemo nnzhi,” Ouaddou o ralo.

“U amba na u tutuwedza vhatambi ngae. Ndi munwe wa vhakapuṱeni vhashu mudavhini.”

Ouaddou o dovha a amba uri Chaine u khou tshimbila zwavhuḓi ngauri thimu i na vhuthihi.

•  VHALANI HAFHU  : Makaab o bvisela khagala vhushaka ha Mngqithi na Chiefs

Zwa zwino, Sipho Chaine ha khou sokou thivhela bola u itela u thusa Pirates — u dovha a ita ḓivhazwakale.