Vha Amakhosi vho ṱuṱuwedza uri vha saine ‘Lamthuthu’
Musi Sipho Mbule o no khwathisedzwa uri o ṱuwa kha Orlando Pirates, mutambi wa kale wa Kaizer Chiefs o ṱuṱuwedza Amakhosi uri vha sedze kha u saina hawe sa izwi vha tshi vhonala vho ḓiimisela u fhaṱa hafhu fhasi ha mugudisi muswa.
Sipho ‘Lamthuthu’ Mbule u ḓo ṱuwa kha Pirates nga murahu ha u sa vha na mushumo wavhuḓi kha hafu ya vhuvhili ya khalanwaha ye ya ita uri mimunithi yawe mudavhini i fhungudzee.
Thendelano yawe i fhela nga dzi 30 dza ṅwedzi wa Fulwi.
Muimeleli wa mutambi, Mike Makaab, o khwaṱhisedza kha KickOff nga Ḽavhuraru uri mutambi wa vhukati u khou ṱutshela tshigwada.
“Afrika Tshipembe, a ri na vhukoni ha vhatambi vha ngaho Sipho Mbule. Ngoho a thi ḓivhi uri ndi mini tshine tsha khou vhilaedzisa hoyu muṱhannga u bva kha vhukoni hawe he a ṋewa nga Mudzimu,”
” Kaizer Chiefs i ṱoḓa muthu ane a kokodza vhathu sa Mbule. Ndi zwe ra vha ri tshi khou zwi shaya zwenezwino sa mvelele ya kilabu.”
“Ndi ene tshithu tsha tsini na Ace Ntsoelengoe. Ndi a kholwa Mbule a nga vhuisa Chiefs he ya vha i hone, fhedzi u khou tea u shandukisa ndila dzawe. U khou toda Yesu Kristo. Ndi tshone tshithu tshine tsha nga thusa mutukana.”
“U khou toda u vhofhololwa, u tea u tenda uri ene e ethe ha ngo eḓana. Ene na Kaizer Chiefs vha nga shuma. Ndi tenda uri u kha ḓi vha na tshikhala tshavhuḓi tsha u vhuya kha thimu ya lushaka tshifhingani tshi ḓaho,” o engedza nga u ralo.
Mbule o dovha a tamba kha SuperSport United na Mamelodi Sundowns, a tevhelwa nga u tamba kha Sekhukhune United kha khalanwaha yo fhiraho.