T Bоse o bvisela khagala ngudo yo mu vhuedzedzaho maanda kha radio ya Kaya 959

Thabo “T Bоse” Mokwele o amba nga ha ngudo khulwane ye ya shandula vhushaka hawe na mushumo wa radio, ya dovha ya mu thusa u dzula o khwaṱha kha Kaya 959 u swika miṅwaha ya 20.

Nga murahu ha u fhedza miṅwedzi mina e hayani musi o no xelelwa nga gig yawe kha Metro FM, o wana tshifhinga tsha u humbula zwavhuḓi nga ha nḓila ye a vha a tshi khou shuma ngayo.

U ya ngae, u huliswa ho ita uri a thome u dzula o vhofholowa nahone a si tsha ḓi lugiselela shuma nga ndila ye a vha a tshi ita mathomoni.

O tenda uri o thoma u ḓitika nga tshenzhemo fhedzi, a si tsha isa maanda kha vhubveledzi ha mihumbulo miswa. 

Nga yeneyo miṅwedzi mina e kule na microphone, T Bоse o vhona uri radio ndi yone ire na  ndeme khulwane khae. Zwenezwo zwo mu ita uri a vhee radio phanḓa ha zwoṱhe, hu sa londwi miṅwe mishumo ine ya nga da.

 O dovha a sumbedza uri naho mbekenyamushumo ya radio i tshi nga dzhia awara tharu, u ḓiimisela hayo hu fana na mushumo wa 9-to-5 musi hu tshi katelwa zwoṱhe zwi itwaho u itela u hasha zwavhudi.

Musi o no swikelela miṅwaha ya 20 yo fhelelaho kha Kaya 959, o amba uri o no vhuya a wana zwinwe zwikhala zwa mushumo, fhedzi a nanga u sala henefho he a pfa e hune a hu funa zwa vhukuma.

Vhushaka hawe na tshititshi tsha Johannesburg ho kona u imela tshanduko dza vhulanguli na milingo ine ya anzela u vha hone kha lifhasi la media.

• VHALANI HAFHU: Limpopo Boy o hanedza uri World Tour 10 yo khanselwa

Tshitori tshawe tshi humbudza uri nga zwiṅwe zwifhinga u xelelwa ndi hone hu itaho uri muthu a dzhiele nṱha tshithu tshe a vha a tshi tshi fara nga nḓila i songo teaho.