Mahlangu u toda u vha na nyambedzano yo dzikaho na Mbuthuma

Mutambi wa kale wa Orlando Pirates Bashin Mahlangu o bvisela khagala uri u na dzangalelo ḽa u dzula fhasi na Yanela Mbuthuma uri vha fare nyambedzano pfufhi.

U amba uri u na nyeletshedzo yo khetheaho ine a tama u i ṋea mutambi wa phanḓa ane a khou sedzana na mutsiko u bva kha vhatikedzi ene muṋe.

Mbuthuma o sasaladzwa vhukuma nga vhatikedzi vha Pirates nga murahu ha u kundelwa u shumisa zwikhala zwavhuḓi kha mitambo ya zwenezwino.

Mutambi wa minwaha ya 24, naho zwo ralo, o wana mbofholowo nga Swondaha musi vhatikedzi vha Durban vha tshi mu sumbedza lufuno nga murahu ha mutambo.

Vho vha vha tshi mu vhidza nga dzina, vha mufha tshidulo vha mu imbela nyimbo dza u mu ṱuṱuwedza.

Mugudisi wa Pirates Vho-Abdeslam Ouaddou na vhone vho imelela Mbuthuma lunzhi-lunzhi.

Uri mushumo une a u itela thimu ndi wa ndeme, naho a songo kora zwikoro zwinzhi.

Zwino mutambi wa kale wa Bucs Bashin Mahlangu o bvisela khagala uri u khou toda u amba thwii na Yanela Mbuthuma uri a mu fhe nyeletshedzo dzine dza nga mu thusa.

“Ndi nga takalela u dzula fhasi na Mbuthuma ra amba ro livhana zwifhaṱuwo,” Mahlangu o ralo.

“Ndi ngauri Mbuthuma a si mutambi muvhi na luthihi.

• VHALANI HAFHU: Kirimu ine ya tsireledza lukanda lutete lwa nwana

O amba uri zwine a khou toda u amba navho nga hazwo zwi do vha thusa sa vhunga ene mune o no fhira kha nyimele dzi konḓaho musi e kha Pirates.