Mvula khulu dzo tshinyadza vhukuma ngei Vhembe
Mvula khulu dze dza na zwezwino ngei Vhembe dzo shandukisa milambo na miedzi ya vha khombo.
Zwa ita uri vhathu vhanzhi vha kumbiwe nga madi, hu tshi katelwa na vhaswa vhavhili .
Vhalanguli vha khou humbela vhabebi na vhadzulapo uri vhana vha vhe kule na maḓi aya , zwihuluhulu musi hu tshi sedzwa u vha hone ha zwipuka zwa ḓaka zwi re na khombo.
Ho no kumbiwa vhathu vhanzhi, zwe zwa ita uri hu vhe na tsivhudzo—zwihuluhulu kha vhana—dza uri vha dzule kule na maḓi.
Vhege yo fhelaho gurannḓa ya Limpopo Mirror yo vhiga nga ha unwelakhothe ha nwana wa miṅwaha ya fumi-sumbe Mpho Mutshinyani ane a vha mugudiswa wa gireidi ya vhutahe tshikoloni tsha sekondari tsha Ozias Davhana.
O nwelakhothe mulindini wa mugodini wo ḓalaho maḓi ngei Mpheni nga ḽa 26 Phando.
Khombo yo dovha ya rwa nga dzi 28 dza Phando musi mugudiswa wa miṅwaha ya 16 wa tshikolo tsha nṱha Akonisaho Gift Maiwashe wa Nthabalala a tshi kumbiwa.
O kumbiwa musi a tshi khou tambela hone na khonani dzawe, dze dza si zwidzhiele ntha musi a tshi dzhena khakhathini.
Murado wa tshitshavha Vho Samuel Baloyi vhari tshitshavha tshi khou tambula nga u ṱanganedza lufu lwa Vho Maiwashe, vha tshi zwi ṱalusa sa tshihumbudzo tshi vhavhaho tsha khombo dza u ṱambela milamboni, nga maanḓa nga tshifhinga tsha mvula.
“Heyi a si khombo ya u thoma ya mufuda uyu. Sa vharangaphanḓa, ri dzulela u eletshedza vhana uri vha songo ṱamba milamboni, nga maanḓa nga hetshi tshifhinga tsha ṅwaha,” Vho Baloyi vho ralo.
O engedza nga uri: “Zwe ra zwi pfa ndi uri mutukana o tou suvhela nga ngomu havha u nwelakhothe hawe.”
Mukomishinara wa mapholisa vunduni la Limpopo Lt-Gen Thembi Hadebe vho bvisa tsivhudzo i vhavhaho kha vhabebi na vhadzulapo.
- VHALANI HAFHU: Tshitzhili tsha Nipah tshi khou thasela vhathu ngei India
“Vhabebi na vhadzulapo vha khou eletshedzwa nga maanda uri vha songo tendela vhana vhavho vha tshi ṱamba kana u pfuka milambo na miedzi.
“Milambo iyi i vha na madi manzhi musi hu tshi na mvula khulwane,” Hadebe o ralo.