Ouaddou o amba nga ha u huvhala ha Nduli
Mugudisi wa Orlando Pirates Vho Abdeslam Ouaddou vho bvisela khagala uri a zwi athu pfala uri mafuvhalo a Sihle Nduli ndi mahulwane vhungafhani.
Nduli o kombetshedzea u bva musi Pirates i tshi tamba 1-1 na AmaZulu FC kha ligi ya Betway Premiership Stadium tsha Kings Park nga Lavhuraru vhusiku.
Mutambo wo vha u tshifhinga tsho khetheaho kha Nduli sa izwi o vha a tshi khou vhuyelela kha thimu nga murahu ha u ḓidzima mushumo lwa tshifhinga tshilapfu nga ṅwambo wa vhuṱungu.
Naho zwo ralo, u vhuya hawe ho thithiswa nga murahu ha mimunithi ya 55.
Nduli o vhaisala vhukuma kha zwiendanungo nga murahu ha musi o bvisisiwa nga Thandolwenkosi Ngwenya.
Hezwi zwo vhanga mbilaelo kha tshigwada tsha Pirates, nga maanḓa sa izwi mutambi uyu a tshi kha ḓi tou bva u vhuya kha u huvhala he ha ita uri a si kone u tamba kha hafu ya vhuvhili ya khalanwaha yo fhiraho.
Vho-Abdeslam Ouaddou vhari thimu i do ita dzinwe ndingo u itela u vhona uri Sihle Nduli o huvhala hani.
“Ro vha ri tshi fanela u mu bvisa ngauri, mashudu mavhi, o vha a sa koni u isa phanḓa na mutambo,” ho amba Ouaddou.
Mugudisi vhari u vhuya ha Nduli Durban ndi tshifhinga tsho khetheaho khae.
“Ro vha ri tshi khou ṱoḓa u mufha tshifhiwa, arali ni tshi humbula, o huvhala hafha Durban.
“So zwo vha zwi zwavhuḓi uri a vhuye a tambe fhano, fhedzi o dovha a huvhala.”