Mofokeng o kolela Chiefs musi a tshi onesana na tshigwada
Mutambi wa Bafana Bafana Relebohile Mofokeng we a di itela dzina kha Orlando pirates o vusa nyambedzano kha zwileludzuzwa vhudavhidzani.
Hezwi zwi khou da nga murahu ha musi vho vhonala vha tshi khou sea Kaizer Chiefs vha sa athu thoma lwendo lwavho luswa ngei Belgium.
Mofokeng zwenezwino o dzhena kha tshigwada tsha Belgium tsha Union Saint-Gilloise nga thendelano ya miṅwaha miṋa nga murahu ha musi o rengiswa nga tshigwada tsha Orlando Pirates.
Musi vha tshi khou amba kha zwe zwa vhonala zwi tshi nga ndi vhuṱambo ha u onesana, Relebohile Mofokeng o livhuwa tshigwada na u fulufhedzisa u isa phanḓa na u shuma nga maanḓa.
A ri: “Ndi ḓo amba nga u tou pfufhifhadza, ndi ḓo ita uri ni ḓihudze nga nṋe.”
“Ndi ḓo zwi ṋea zwoṱhe sa zwe nda ita musi ndi tshi tamba kha Pirates.”
O mbo ḓi amba zwi tevhelaho zwe u bva tsheetsho zwa vha zwi tshi khou phaḓalala kha zwileludzi zwa vhudavhidzani.
“Kaizer Chiefs vha tsini na u fema ngauri ndi khou ṱuwa,” o bvela phanḓa.
Muṅwe we a vha e hone o fhindula nga u ṱavhanya a ri: “Na Sundowns,” nahone ha vha na u sea.
Tshitatamennde itshi tsho no phaḓalala kha inthanethe nahone tsho ḓisa phindulo dzo fhambanaho.
Vhaṅwe vha ri ho vha hu tshi tou vha muswaswo wo ḓoweleaho wa bola ya milenzhe, ngeno vhaṅwe vha tshi pfa uri Relebohile Mofokeng o vha e na vhuhali vhuhulwane kha vhapikisi vha Pirates.
- VHALANI HAFHU : Mutambi wa sundowns o vhuyelela u guda na tshigwada
Mutambi uyu u ṱuwa Afrika Tshipembe o no ḓi ḓitika sa muṅwe wa vhatambi vhatuku vha re na vhukoni.
Nahone vhanzhi vha tenda uri u ḓo bvelela vhukuma ngei Belgium.