Pirates yo ṱanganedza vhatambi vhaswa, ya bvisa vhaṱanu

Orlando Pirates yo khwathisedza u swika ha vhatambi vhaswa vhaṋa musi i tshi khou isa phanḓa na u khwaṱhisa tshigwada tshayo tsha u tsireledza tshiphuga tsha Betway Premiership kha khalanwaha i ḓaho.

Nga murahu ha vhege dza mavharivhari, Pirates yo divhadza lwa tshiofisi u saina vhatambi vha tevhelaho:

Mthetheleli Mthiyane u bva kha thimu ya Stellenbosch FC, Sbangani Zulu u bva kha thimu ya Richards Bay, na Bohale Ngwato na Ghampani Lungu u bva kha thimu ya Siwelele FC.

U swika ha Mthiyane zwi tshimbilelana na u ṱuwa ha mutsireledzi Thabiso Lebitso, we a dzhena kha Stellenbosch FC sa tshipiḓa tsha thendelano ya u tshintshana vhatambi.

Musi vhatikedzi vha tshi khou pembelela u swika ha vhatambi vhaswa, Orlando Pirates na yone yo divhadza u tuwa ha vhatambi vhatanu musi season i tshi fhela.

Vhatambi vhane a vha tsha vha tshipiḓa tsha Buccaneers ndi Bandile Shandu, Sipho Mbule, Tshegofatso Mabasa, Karim Kimvuidi na Deivi Miguel Vieira ane a ḓivhiwa nga dzina ḽa Gilberto.

U ṱuwa ha Mbule na Mabasa zwi nga vha zwithu zwine zwa ḓo ṱungufhadza vhukuma vhatikedzi sa izwi vhuvhili havho vho ita zwithu zwavhuḓi kha thimu nga zwifhinga zwo fhambanaho.

Orlando Pirates yo livhuwa vhatambi avha vhothe kha mushumo wavho  kha kilabu, na u vha tamela mashudu kha mishumo yavho ya matshelo.

• VHALANI HAFHU : Siphiwe Tshabalala kha tshikoloni tsha Mabindu tsha Harvard 

Musi vhatambi vhaswa vha tshi khou swika na vhanwe vha tshi khou ṱuwa, zwi khagala uri thimu yo ḓiimisela kha khalanwaha i ḓaho.

Mugudisi Vho-Abdeslam Ouaddou vho thoma u lugisela nndwa ntswa ya u tsireledza tshiphuga tsha ligi na u pandamedza ligi ya vhahali vha CAF kha khalanwaha ya 2026/27.