Broos kha mutambo wa Bafana Bafana wa u vula World Cup

Mugudisi wa Bafana Bafana Vho-Hugo Broos vho tenda uri vhatambi vhavho vha tsini na u tangana na khaedu ine a vha athu vhuya vha tangana nayo.

Hezwi zwi ḓo itea musi Afrika Tshipembe ḽi tshi ṱangana na Mexico kha mutambo wa u vula wa Tshiphuga tsha Ḽifhasi.

Mutambo une wa khou lavhelelwa vhukuma u ḓo tambelwa ngei Estadio Azteca nga Ḽavhuṋa.

I ḓo thoma lwa tshiofisi thonamennde khulwanesa ya bola ya milenzhe ḽifhasini.

Vhatikedzi vha dzimiḽioni vha khou lavhelelwa u ṱalela u mona na shango nahone tshitediamu tshi ḓo ḓala nga vhatikedzi vha hayani.

Kha Hugo Broos na tshigwada tshawe tsha Bafana Bafana, heḽi ndi ḓuvha ḽe vha vha vha tshi ḽi ṱulutshelwa.

“U a ḓivha, zwi ḓo vha zwo khetheaho nahone zwi zwavhuḓi kha riṋe ngauri vhatambi vhanga a vha athu vhuya vha tamba kha nyimele ya lushaka ulu,” Broos o ralo.

Mugudisi u lavhelela uri thimu yawe i ḓo sedzana zwavhuḓi na khaedu i konḓaho.

Vho humbela vhatambi vhavho uri vha dzule vho livha kha mushumo we vha u ita u swika fhano, vha songo thithiswa nga tshithu.

“Zwi ḓo vha zwa ndeme vhukuma uri ri farelele kha pulane ya mutambo ri sa thetshelese zwine zwa khou itea nnḓa.

“Ri a zwi ḓivha uri hu ḓo vha na zwigidi zwa vhathu vha Mexico nga ngomu tshitediamu na  vhathu vha si gathi vha Afrika Tshipembe.”

• VHALANI ZWINWE : Zwane u bvisela khagala zwine zwa muṱuṱuwedza u tamba

Naho vha tshi ḓo vha na vhatikedzi vhaṱuku ngei Mexico City, Hugo Broos u ombedzela uri Bafana Bafana a i nga ḓo tshuwiswa nga zwenezwo.