Vhathu vho pandelwaho vha ri vha kha ḓi vhona vhumatshelo Afrika Tshipembe
Vhathu vho pandelwaho vhane vha khou humela mashangoni avho vhari a vha nga dzuli tshothe Afrika Tshipembe.
Vhunzhi havho vhari vha khou toda u vhuya zwi mulayoni musi vho no fhedza u ita mabambiri avho a u dzhena shangoni.
Vhunzhi ha vhathu vho pandelwaho vha ri vha kha ḓi vhona vhumatshelo Afrika Tshipembe.
Hezwi zwo bvelela musi TimesLive i tshi tangana navho musi vha tshi khou di lugisela u namela bisi dzine dza khou ya mashangoni avho.
Vho dovha vha amba uri vho ḓiimisela u vhuya musi maṅwalo avho o no dzudzanyea.
Muṅwe wavho, Kwabashe Mutopo (29) u bva Zimbabwe, uri o swika Afrika Tshipembe nga 2022 a tshi khou ṱoḓa zwikhala zwa khwine.
Vho vhudza TimesLive uri lwendo lwavho lwo dzhia maḓuvha mararu nga bisi u swika mukanoni wa Beitbridge.
Musi vhaṋameli vho no tsa, vho mbo ḓi ṱuwa nga milenzhe vha sa athu isa phanḓa na SA vha si na mambambiri.
“Murathu wanga o mmbudza uri ikonomi ya Afrika Tshipembe ndi khwine, ndi ngazwo ndo mu tevhela fhano,” ho amba Mutopo.
O amba uri nga u ṱavhanya o wana mushumo ngei Germiston, he a vha a tshi shuma hone sa zama zama.
Uya nga ha vhone, vhutshilo Afrika Tshipembe ho vha vhu songo leluwa nahone o vha a tshi fanela u dzulela u badela mapholisa uri vha si mu fare.
“Ṅwaha wo fhiraho, na nṋe ndo farwa nahone ndo badela R2000 uri ndi bve, ngauralo ndo vha ndi tshi dzulela u vhea tshelede thungo kha zwenezwo,” ho amba Mutopo,
We a dzumbulula uri o vha a tshi tshila nga tshelede yeneyo lwa miṅwaha miṋa yo fhiraho.