Bucs Mthombeni u ṱalutshedza vhubvo ha dzina Bucs
Mudzulatshidulo wa Casric Stars na mugudisi Bucs Mthombeni o thoma thimu yawe ya u thoma a na miṅwaha ya Malo fhedzi.
Hezwi zwo bviselwa khagala musi a tshi ṱalutshedza uri o wana hani dzina ḽawe ḽa u ḓihudza, Bucs, ḽine ḽa vha dzina ḽa u ḓihudza ḽa Orlando Pirates.
Bucs Mthombeni zwa zwino ndi muhali kha bola ya milenzhe ya Afrika Tshipembe nga murahu ha musi thimu yawe yo kunda Bulls ine ya ofhiwa kha mitambo ya Nedbank Cup.
Casric Stars yo mangadza vhanzhi nga u kunda Orlando Pirates na AmaZulu FC nga u tevhekana nga u ṱavhanya u itela u swika kha semi-finals.
Musi vha tshi vhudziswa nga ha dzina ḽavho ḽo khetheaho, Vho-Mthombeni vho dzumbulula uri ḽo thoma musi vha tshi khou tamba bola ya milenzhe ya zwiṱaraṱani hayani havho KwaNdebele ngei Mpumalanga.
“Ḽiṅwe ḓuvha ro ya u tamba mutambo wa bola ya milenzhe ya tshiṱaraṱani na khonani dzanga,” o vhudza KickOff.
“Hone ro vha ri tshi kha ḓi tamba nga bola dza pulasitiki, ro vha ri tshi tamba mutambo wa mimunithi ya 30 hune hafu iṅwe na iṅwe ya vha na mimunithi ya 15.
“Ḽeneḽo ḓuvha zwo itea uri ndi vhe na tshelede nnzhi tshikwamani tshanga.
“Hone misi yeneyo ro vha ri tshi vhea 10c kana 20c kha mutambo munwe na munwe.
“Zwino musi ndi tshi bvisa heyi tshelede tshikwamani tshanga, khonani dzanga dzo vhidzelela nga dakalo…
“Muṅwe wavho o ita tshiga tsha marambo a Orlando Pirates nahone a ri “Up The Bucs! U bva zwino dzina ḽau ndi Bucs!”.”
Dzina ḽo vha ḽo nambatela khae, nahone o vha a tshi ḽi funa ngauri o vha o no vha mufuni wa Orlando Pirates.
“Ndo vha mufuni wa Orlando Pirates nga tshifhinga tsha vho Bashin Mahlangu, Mandla ‘Metroblitz’ Mthombeni, Botsotso Makhanya, Black Sunday Masegela, na Tebogo Moloi.
“Ndi murafho wa zwitaela zwa mavhudzi zwi sa pfali na dzi shibobo,” ho engedza Mthombeni.
“Ndo vha muṋe wa thimu ndi tshe muṱuku, ndo vha ndi na miṅwaha ya malo fhedzi.
“Vhunzhi ha vhathu a vha tendi uri ndo thoma u shuma ndi na minwaha ya 11, ndi tshi hola 50c nga duvha ndi tshi fuwa kholomo bulasini dza vhatshena.