Mbilaelo dza tsireledzo dzo imisa kilasi vhuponi ha Vhembe na Mopani

Muhasho wa pfunzo vunduni la Limpopo wo imisa pfunzo dza zwikolo kha zwipida zwa zwitiriki zwa Vhembe na Mopani nga nthani ha mvula khulu na bada dzi songo tsireledzeaho.

U valwa uhu ha maḓuvha mavhili hu khwaṱhisedza tsireledzo ya matshudeni na vhashumi ngeno vhalanguli vha tshi khou ṱola tshinyalelo ya miḓalo na u ṱola nyimele.

U ya nga muhasho, bada dzo ḓalaho maḓi dzo ita uri zwi konḓele vhagudiswa, vhagudisi na zwiendedzi zwa vhagudi u swika zwikoloni zwinzhi.

Zwikolo fhethu ho kwameaho zwi ḓo dzula zwo valwa lwa maḓuvha mavhili, Musumbuluwo wa ḽa 16 Ṱhafamuhwe na Ḽavhuvhili ḽa ḽa 17 Ṱhafamuhwe, ngeno vhalanguli vha tshi khou sedzulusa khombo dza tsireledzo.

Vhaofisiri vhari tsheo yo dzhiiwa u itela u thivhela khombo ine ya nga vha hone kha vhagudi na vhashumi nga tshifhinga tsha mutsho muvhi une wa khou bvela phanḓa.

Ho dovha ha ṱanganedzwa mivhigo ya u vuḓa ha ṱhanga na u tshinyadzwa nga maḓi kha zwiṅwe zwikolo, ngeno nyimele dza kilasini dzo nukalaho dzi tshi nga ḓisa khombo dzo engedzeaho dza tsireledzo.

Muhasho wo dovha wa bvisela khagala mbilaelo dza u tswiwa zwikoloni nga tshifhinga tsha u thithisea.

Hu pfi vhatshinyi ho sedza kha  zwiḽiwa zwo itelwaho mbekanyamushumo ya pfushi ya zwikolo, khathihi na zwishumiswa zwa eḽekiṱhironiki.

Ofisi dza zwiṱiriki dzo ḓivhadza ṱhoho dza zwikolo na vhalanguli vha zwiṱiriki nga ha u imiswa lwa tshifhinganyana.

Vha na vhuḓifhinduleli ha u ḓivhadza vhabebi na zwiimiswa zwi langaho zwikolo kha vhupo havho.

• VHALANI HAFHU: Gogo Skhotheni o divhadza uri o vhifha muvhilini

Vhabebi vhane vha khou ṱoḓa mafhungo nga ha vhuimo ha zwikolo zwavho vha eletshedzwa uri vha kwame ṱhoho dza zwikolo kana ofisi dza zwiṱiriki zwapo.