Thlolane u vhona Mbule kha mutambi muswa wa Orlando Pirates

Mutambi wa kale wa Orlando Pirates, Tebogo Thlolane, o talutshedza mutambi muswa we a sainwa nga tshigwada, Matome Mmolai sa munwe wa vhatambi vhane vha vha na vhukoni, a ita na u mu vhambedza na Sipho Mbule.

Thlolane uri Mmolai una vhukoni vhuhulwane nahone u tenda uri u do sumbedza zwithu zwihulwane kha Pirates.

“Hoyo mutukana ngoho u bva Alexandra. U na vhukoni vhuhulwane nahone ndi a tenda uri u do bvelela kha Pirates” ndi Thlolane.

Orlando Pirates yo saina Mmolai kha thimu ya Leicesterford City ine ya khou tamba kha vhuṱaṱisani ha Motsepe Foundation phanḓa ha khalanwaha i ḓaho.

Vho amba uri phambano khulwane ndi ya uri mutsiko u ḓo vha muhulwane kha Pirates u fhira kha Leicesterford, fhedzi vha a pfesesa zwine zwa lavhelelwa khavho.

“O vha a tshi tamba o vhofholowa, sa izwi ro vhona Sipho Mbule a tshi khou tamba na u ḓiphina nga u vha kha bola.

“Tshiṅwe tshifhinga o vha a tshi dzhia zwikoro zwiraru kana zwiṋa kha mutambo muthihi nga ṅwambo wa vhutsila hawe,” ho amba Thlolane.

Thlolane uri u dzhena kha Pirates zwi do mu thusa u aluwa sa izwi a tshi do vha a tshi khou shuma fhasi ha vhagudisi vha maimo a ntha.

Naho zwo ralo, o mu sevha uri u ḓo tea u wana vhuimo hawe kha yeneyi thimu yo ḓalaho ṋaledzi.

“Ha ngo fanela u lavhelela u tamba mutambo muṅwe na muṅwe. A hu na muthu we a mu khwaṱhisedza vhuimo kha thimu.

• VHALANI NA IZWI: Stellies i bvisela khagala uri ndi ngani vha tshi takalela Mashego

“U tea u ḓi sumbedza, u sumbedza nḓala yawe ya u bvelela na u ḓowela nḓila ine thimu ya tamba ngayo,” ho phetha nga u ralo Thlolane