Stellies i bvisela khagala uri ndi ngani vha tshi takalela Mashego

Stellenbosch FC yo divhadza lwa tshiofisi u saina mutambi muswa, Terrence Mashego.

Mutambi wa murahu wa tsha monde o dzhena kha thimu ya Gavin Hunt ubva kha Mamelodi Sundowns nga loan kha khalanwaha ya 2026/27.

Mutambi wa minwaha ya 28 o dzhena kha Stellenbosch nga murahu ha u tamba kha khalanwaha yo bvelelaho nga khadzimiso kha Durban City, he a thusa thimu u wina Nedbank Cup.

Ho vha hu lwa vhuvhili Terrence Mashego a tshi takula tshiphuga nga murahu ha musi o tshi wina na TS Galaxy nga 2019, he vha ita ḓivhazwakale nga u kunda Kaizer Chiefs kha mutambo wa u fhedzisela.

Mashego o dovha a wina zwiphuga zwiraru zwa Betway Premiership na African League ya Bola ya Milenzhe musi a tshi khou tamba kha Sundowns nga khadzimiso.

Vho dovha vha vha tshipiḓa tsha thimu ya Bafana Bafana ye ya fhedza i kha vhuimo ha vhuraru kha Africa Cup of Nations ya 2023.

Muhulwane wa Stellenbosch Vho-Rob Benadie vhari vho takala vhukuma nga u saina mutambi uyu.

“Terrence ndi mutambi a re na tshenzhemo vhukuma we a tamba kha vhuimo ha nṱhesa kha shango na kha dzitshaka.

“Ri tenda uri u ḓo ḓisa vhuimo ha nṱha kha thimu yashu, nahone ro takalela u mu ṱanganedza Stellenbosch,” ho amba Benadie.

• VHALANI ZWINWE  : Gabisile Tshabalala kha Moja Love sa sa munwe wa vhahashi vhavho

Vha Stellenbosch vha khou renga Terrence Mashego nga murahu ha musi hu si kale vho kundwa kha mutambi wa murahu wa tsha monde Omega Mdaka nga tshigwada tsha AmaZulu FC.