Khan o dzumbulula uri ndi ngani a sa ṱoḓi Pitso kha Bafana
Mueletshedzi wa kale wa vhagudisi vha tshigwada tsha Safa Vho-Farouk Khan vhari naho Vho-Pitso Mosimane vhe munwe wa vhagudisi vha khwine fhano Afrika,
Vha vhona vha si muthu o teaho u gudisa tshigwada tsha Bafana Bafana.
Safa i kha di toda muthu ane a nga dzhiela vhudzulo Hugo Broos, we a fhedza minwaha mitanu yo bvelelaho a tshi khou langa thimu ya lushaka.
Khan o khoḓa u bvelela ha Mosimane kha bola ya milenzhe ya dzikiḽaba Afrika, fhedzi a ri u gudisa thimu ya lushaka zwi ṱoḓa muthu a re na tshenzhemo khulwane ya dzitshaka.
“Ndi vhona unga Pitso o ḓi sumbedza nga vhuḓalo. O ita zwavhuḓi vhukuma kha bola ya milenzhe ya dzikiḽaba kha dzhango,” ho amba Khan.
“Fhedzi ri tea u humbula uri musi Hugo Broos a tshi swika, o vha o no vha na tshenzhemo yo eḓanaho ya u gudisa thimu dza lushaka.
“Naho Pitso Mosimane e mugudisi wa maimo a nṱha, ha na tshenzhemo nnzhi kha bola ya milenzhe ya dzitshaka.Tshifhinga tshawe kha Bafana Bafana tsho vha tshi tshipfufhi.”
Khan uri u thola mugudisi a si na tshenzhemo yo eḓanaho ya dzitshaka zwi nga vha khombo.
“Ndi mulanguli wavhuḓi vhukuma, fhedzi ri fanela u ḓivhudzisa arali ri tshi ṱoḓa u vhea thimu ya lushaka khomboni nga u thola muthu a si na tshenzhemo yo eḓanaho ya dzitshaka.
“Mushumo uyu u ṱoḓa muthu we a shuma kha vhuimo uhu,” Khan o bvela phanḓa.
“U fhaṱa thimu ya lushaka a si u ṋea muthu tshikhala tsha u guda mushumoni.”
Musi vha tshi amba uri vha ṱhonifha na u takalela Mosimane, Khan o ri Safa i fanela u tevhela nḓila ye ya shuma na Broos.