Shabalala u thoma ndima ntswa na khamphani ya Puma 

Mutambi wa Kaizer Chiefs Vho-Mduduzi Shabalala vho saina thendelano na khamphani ya zwiambaro zwa mitambo ya Puma phanḓa ha musi hu tshi thoma khalanwaha ya 2026/27, vha tshi ṱutshela khamphani ya Nike.

Mutambi wa minwaha ya 22 zwino ndi munwe wa vhatambi vhane vha vha tshifhatuwo tsha khokho ntswa dza Puma Ultra 7 Nitro.

Shabalala uri u dzhena kha Puma ndi tsheo yo teaho ngauri zwipikwa zwa khamphani zwi tshimbilelana na zwine a zwi tama kha bola ya milenzhe.

“U dzhena kha muṱa wa Puma ndi tsheo yo teaho kha nṋe ngauri ndi tenda kha zwithu zwi fanaho na zwa khamphani iyi, zwine zwa vha fulufhelo, u shuma nga maanḓa na lutamo lwa u kunda,” ho amba Shabalala.

“Sa mutambi wa bola ya milenzhe, ndi shuma nga maanḓa ḓuvha ḽiṅwe na ḽiṅwe u itela u khwinisa, u tamba nga nḓila ya nṱha na u ita phambano nga ngomu na nnḓa ha mudavhi.

“Ndi tenda uri vhuḓiimiseli hanga, u shuma nga maanḓa na u funesa bola ya milenzhe ndi zwavhuḓi kha Puma.”

• VHALANI ZWINWE: Zola Mhlongo o divhadza mushumo muswa wa u hasha na Moshe

Mduduzi Shabalala o dovha a bvisela khagala uri khonani yawe ya tsini na mutambi ngae kha Chiefs, Mfundo Vilakazi, ane na ene a vha kha Puma, ndi ene we a ṱuṱuwedza tsheo yawe.

Mduduzi Shabalala zwino u do dzhena kha khalanwaha ntswa o ambara khokho dza Puma sa izwi o diimisela u thusa Chiefs kha u lwela zwiphuga.