Skwishi o dzumbulula uri u vhambedzwa na 16V zwo mu thusa hani

Mutambi wa Bafana Bafana na Mamelodi Sundowns Vho-Siyanda “Skhwishi” Ndlovu vho bvisela khagala vhuḓipfi  havho malugana na u vhambedzwa na mutambi wa bola ya milenzhe wa Afrika Tshipembe Doctor “16V” Khumalo.

Hezwi zwo itwa nga mugudisi wawe wa kale wa Golden Arrows Vho-Manqoba Mngqithi.

Mngqithi vha khoḓwa nga u tamba mushumo muhulwane kha mveledziso ya Ndlovu nga tshifhinga tshawe kha Arrows.

Nga fhasi hawe, Ndlovu o sumbedza nyaluwo khulwane kha mutambo wawe.

Mugudisi o vhuya a khoḓa kushumele kwa Ndlovu vha amba uri u na zwine a fana ngazwo na Dr Khumalo, mutambi wa kale wa Kaizer Chiefs na Bafana Bafana.

Ndlovu uri u vhambedzwa na munwe wa vhatambi vhahulwane kha divhazwakale ya bola ya milenzhe ya Afrika Tshipembe zwo mu takadza vhukuma.

O amba uri maipfi aya o mu ṋea ṱhuṱhuwedzo ya u shuma nga maanḓa na u bvela phanḓa na u khwinisa kushumele kwawe.

“Ndi vhona unga nḓila ye nda tamba ngayo na nḓila ye mugudisi a nnyita ngayo uri ndi tambe zwo fhedza zwo ita uri a mmbambedze nae,” Ndlovu o ralo.

“Zwenezwo zwo ntakadza vhukuma ngauri ndo kona u mu ṱalela a tshi khou tamba zwiṱuku.

“Fhedzi ndo vhona uri u na vhukoni vhungafhani na uri u na zwingafhani.

“Ngauralo u vhambedzwa nae zwo ita uri ndi takale.

Ndo dovha nda vha na muloro wa uri kushumele kwanga ku nga swika kha vhuimo ha nṱha, na u imela thimu ya lushaka.

“Khamusi u pfa maipfi eneo zwo nthusa u tamba nga nḓila ye nda ita ngayo kha Arrows.

“Ndo fara eneo maipfi u itela u vha zwine nda vha zwone ṋamusi.”

• VHALANI ZWINWE :Vhokhotsi na vho vha khomboni ya u farwa nga mutsiko

Nga u vhambedza na Dr Khumalo zwo ṱuṱuwedza Siyanda Ndlovu, zwino vha khou lavhelelwa u ḓi sumbedzisa kha Bafana.