Pfufho dza Muzika dza Crown Gospel dzo wana mulambedzi muswa
Tshiitea tshihulwanesa tsha pfufho dza muzika wa gospel Afrika Tshipembe tsho dzhena kha tshifhinga tshiswa nga murahu ha u ḓivhadza mutikedzi muswa wa tshiphuga.
Tshiitea itshi, tshe tsha kunga zwigidi zwa vhafuni vha muzika wa gospel kha miṅwaha ya 19 yo fhiraho, zwino tshi ḓo ḓivhiwa lwa tshiofisi sa Pfufho dza Muzika dza Icebolethu Crown Gospel.
Nḓivhadzo iyi yo itwa nga tshifhinga tsha u rwelwa ṱari ha tshiofisi ha pfufho ngei Hodela ya Coastlands ngei Umhlanga nga Ḽavhuraru.
Bishop Vho-Mpendulo Nkambule vhari vhufarisani na Icebolethu vhu do vhuedza vhathu vhanzhi vhane vha shuma kha nḓowetshumo ya u ḓimvumvusa.
“Heyi ndi thandela khulwane ine ya vhuyedza muṅwe na muṅwe, u bva kha vhaḓivhi vha mavhudzi na vhaḓivhi vha zwa u ita makeup u swika kha vhaṅwe vhanzhi vhane vha shela mulenzhe nga murahu ha makhetheni,” vho ralo.
Vho-Nomfundo Mcoyi-Zondo vha Icebolethu vho ita khuwelelo kha vhaṋe vha mabindu vha vharema uri vha tikedzane nṱhani ha u fhaladzana.
Vho dovha vha ita khuwelelo kha muvhuso uri u tikedze pfufho dza muzika dza Icebolethu Crown Gospel uri mushumo u bvele phanḓa na u aluwa.
Vho-Mcoyi-Zondo vhari vhushaka havho na Crown Gospel Music Awards yo thoma miṅwahani minzhi yo fhiraho,
Musi vha tshi shumisana na muthomi wayo, mufu Vho-Zanele “MaZet” Mbokazi, vhe vha vha vha tshi dovha vha vha khonani yavho ya tsini.
Vho tenda uri vhaṅwe vhathu vha nga humbula uri vha khou ṱoḓa u dzhia ifa ḽa Mbokazi, fhedzi vha ombedzela uri tshipikwa tshavho ndi u thusa u vhulunga na u alusa bono ḽe vha ḽi thoma.