Sheppard o bvisela khagala zwipikwa zwa Chiefs kha khalanwaha ntswa

 Muthusa mugudisi wa Kaizer Chiefs Vho-Dillon Sheppard vhari thimu i khou sedza kha u wina zwiphuga kha khalanwaha ya 2026/27.

Vho amba uri vha khou ṱoḓa u thoma nga u dzhia tshiphuga tsha MTN8, tshe tsha vha tsho farwa nga vhahura vhavho Orlando Pirates lwa miṅwaha miṋa i tshi khou tevhekana.

Amakhosi yo fhedza i kha vhuimo ha vhuraru kha Betway Premiership kha khalanwaha yo fhiraho, ndi u vhuya havho ha khwine u bva kha khalanwaha ya 2019/20.

Hezwi zwo dovha zwa vha vhuisa kha MTN8 nga murahu ha musi vho xelelwa ngayo lwa khalanwaha mbili dzi tshi khou tevhekana.

Vho-Dillon Sheppard vhari MTN8 ndi muṱaṱisano wa ndeme ngauri u ṋea tshikhala tsha Kaizer Chiefs tsha u wina tshiphuga nga u ṱavhanya.

“Ndi zwa ndeme uri thimu i ṱaṱisane kha miṱaṱisano yoṱhe,” ho amba Sheppard.

“Zwenezwo zwi thoma nga MTN8. I na mitambo miṋa fhedzi, zwine zwa amba uri u na tshikhala tshavhuḓi tsha u wina tshiphuga,” Sheppard o vhudza SABC Sport.

U amba uri u wina tshiphuga mathomoni a khalanwaha, zwo ṱangana na u thoma zwavhuḓi kha ligi, zwi nga ṋea thimu maanḓa manzhi a u lwa u swika khalanwaha i tshi fhela.

Naho Chiefs yo sumbedza u khwiṋiswa kha khalanwaha yo fhiraho, Sheppard u tenda uri vhatikedzi vha kha ḓi ṱoḓa u bvelela ho engedzeaho.

• VHALANI HAFHU: Ntando Rambani u Pembelela u vula ha salon yawe ntswa

O amba uri nga fhasi ha mugudisi muswa, Fernando da Cruz, vha na pulane ya u vhuisa Chiefs kha maḓuvha ayo a vhugala.