‘Sa vhatikedzi vha Chiefs, ro farwa luvhi nga Pirates’

Mutikedzi a ḓivheaho wa Kaizer Chiefs Jack ‘Mashonisa’ Zwane, u kovhelana tshenzhemo yawe ya Soweto Derby, a tshi dzumbulula nḓila ye a kombetshedzea ngayo u ṱalela mutambo kha thebulethe yawe naho o vha e na thikhithi ya VIP.

Amakhosi na vhapikisi vhayo Orlando Pirates vho tamba nga 1-1 phanḓa ha vhathu vho rengwaho vhoṱhe tshitediamu tsha FNB nga Swondaha.

“Yho! Ndo dinalea vhukuma nga ha derby iyi. Ndi a zwi ḓivha uri ho vha hu si mutambo washu [wa hayani], fhedzi ndo kundelwa u dzhena tshitediamu ngauri muṅwe muofisiri o ri tsho ḓala.

“Zwe zwa ntshuwisa ndi uri vhaṅwe vhathu vho dzhena hu si na muofisiri o ṱolaho thikhithi dzavho. Nda humela murahu na thikhithi dzanga dza VIP.

“Nda dovha nda renga thikhithi dza u paka fhedzi nda dovha nda humiswa. vhaofisiri  vha Pirates a vha ngo kona u dzudzanya zwithu zwavhudi,” hu amba Vho-Mashonisa.

“Zwine zwa mangadza ndi uri vhatikedzi vha 13 vha re murahu hanga vho tendelwa u dzhena tshitediamu. Ndo vhudzisa munwe mulindi wa tsireledzo uri zwi konadzea hani, fhedzi pholisa, line la di divhadza sa Colonel Modise, la ri, ‘bvelani  kule hangei, Mashonisa.’

“Ri a zwi ḓivha uri ni khou vhanga thaidzo nga ngomu tshitediamu.’ Zwe zwa mmbaisa ndi uri vhatikedzi vha Pirates vha re murahu hanga vho tendelwa u dzhena vha songo vhudziswa tshithu.

“Ṱhalutshedzo yavho ya u thoma yo vha ya uri tshitediamu tsho vha tsho no ḓala nahone vho vha vha tshi khou humbulela uri vhaṅwe vho dzhena vha si na thikhithi.

“Ngauralo, ndo mbo ḓi dzhia tsheo ya u dzula goloini yanga nda ṱalela mutambo kha tablet yanga, ndo ḓi fara thikhithi yanga ya VIP,” o engedza nga u ralo.

• VHALANI HAFHU:  Tshego Mabasa ha tsha vha gammbani ya Pirates

Vho-Mashonisa vhari tshenzhemo i vhavhaho yo vha sia vho dinalea sa izwi vho ‘tambisa’ peṱirolo vha tshi khou reila u bva Mpumalanga vha tshi ya FNB Stadium .