Kilaba PSL i khakhathini na Fifa, yo iledzwa u nwalisa vhatambi

Iṅwe ya thimu dzine dza khou tamba kha Betway Premiership yo dovha ya ḓiwana i khakhathini na Fifa sa izwi yo iledzwa u ṅwalisa vhatambi vhaswa.

Hezwi zwi tevhela u kundelwa u badela mutambi wa kale wa vhukati, Roland Sanou.

Sanou wa minwaha ya 24 o vha o tendelwa u tamba na Chippa United kha khalanwaha ya 2024/25.

Fhedzi ha athu tamba mutambo na muthihi wa tshiofisi nga murahu ha musi o dzhena kha tshigwada nga mahala u bva kha Moroka Swallows.

Mutambi wa Burkina Faso o isa mafhungo aya kha Fifa, ye ya fhedza yo dzhia tsheo i tshi mu tikedza.

Kha vhurifhi he vha vhu ṅwalela kilaba, Fifa yo ḓivhadza Chippa United uri yo iledzwa u ṅwalisa vhatambi vhaswa, kha dzitshaka na Afrika Tshipembe.

Nyiledzo i ḓo dzula i hone u swikela tshigwada tshi tshi badela tshelede yoṱhe ye ya vha i tshi kolodwa mutambi.

U thivhelwa ndi ha mafasiṱere mararu a tevhekanaho a u  saina vhatambi vhaswa.

FIFA yo dovha ya ṋea ndaela dzangano ḽa bola ya milenzhe ḽa Afrika Tshipembe (Safa) uri ḽi thome nga u ṱavhanya nyiledzo ya u ṅwalisa vhatambi.

Sanou o tamba mitambo ya 12 kha tshigwada tsha Swallows nga murahu ha musi o dzhena kha tshigwada tsha Royal FC Bobo ngei Burkina Faso.

• VHALANI HAFHU: Ncanana o bvisela khagala zwe a amba nga ha Pirates

Nga murahu ha musi vho no ṱuwa kha tshigwada tsha Chippa United, vho vhuyelela shangohaya ḽavho hune zwino vha khou tamba kha tshigwada tsha Vitesse FC.