Lebogang Mokoena o topola vhatambi vha re na vhukoni
Mutambi wa kale wa Mamelodi Sundowns Lebogang Mokoena u vhona uri vhanwe vha vhatambi vha thimu vho vha vho fanela u vha vhe mashangoni a nnḓa kale.
Musi vha tshi khou amba kha Soccerbeat Podcast, Mokoena o vhudziswa uri ndi vhafhio vhatambi vhane a vhona vho vha vho fanela u vha vha nnḓa ha shango.
Lebogang Mokoena uri o vhona vhatambi vha si gathi vha Sundowns vhe vha tamba zwavhuḓi kha mitambo ya Africa Cup of Nations (AFCON) ngei Ivory Coast vho vha vho fanela u vha vha nnḓa ha shango.
Bafana yo fhedza i kha vhuimo ha vhuraru kha yeneyo thonamennde. Nahone vho vha vhe iṅwe ya thimu dza khwine.
Vhatambi vhanzhi vha Bafana vha khou pfala vha tshi khou kunga vhatambi vha nnḓa ha shango.
“Hu na vhatambi Afrika Tshipembe vhe vha vha vho fanela u kunga dzangalelo ḽa mashangoḓavha,” ho amba Lebogang Mokoena.
Fhedzi-ha, u pomoka thimu dzapo – nga maanḓa Sundowns – uri dzi khou fara vhatambi vhadzo na u sa vha tendela u pfulutshela nnḓa ha shango.
“Fhedzi ho vha na thaidzo kha thimu dzashu dza Afrika Tshipembe hune dza sa ṱoḓe u bvisa vhatambi,” Mokoena o isa phanḓa.
“Vha ṱoḓa u vha vhulunga lwa tshifhinga tshilapfu nga hune zwa konadzea ngaho nahone tshiṅwe tshifhinga vhatambi vha swika hune vha sa tsha rengiswa.”
O ṋea tsumbo ya Khuliso Mudau na Teboho Mokoena vhane hu khou pfala uri vho vha na zwifhiwa zwinzhi fhedzi vha kha ḓi tamba kha Sundowns.
“Wanga sedza Tebza Mokoena nga murahu ha Afcon yeneyo, ndi vhona unga o ḓivhea kha ḽeneḽo ḽeveḽe…
O sumbedza uri a nga tamba kha vhuimo ha nṱhesa,” ho ṱalutshedza Lebogang Mokoena.
“Havho ndi vhatambi vhavhili vhane nda vhona vho vha vho fanela u vha vha tshi khou tamba mashangoni a nnḓa nga zwino.
- VHALANI HAFHU : The Don o fhiwa fulethe ntswa nga vhafuni vhawe
“Sundowns ina Jayden Adams zwino – vhonani uri o vhofholowa hani kha bola ya milenzhe…
“U nga amba uri o no hula nahone a nga kona u langa mushumo zwino,” ho engedza mutambi we a ita dzina ḽawe kha Orlando Pirates.