Makhadzi o humbela pfarelo kha tshitshavha
Makhadzi o humbela pfarelo kha tshitshavha nga murahu ha musi o sedzana na u sasaladzwa nga nṱhani ha ṱhalutshedzo dza zwenezwino dze dza vusa khanedzano khulwane kha zwileludzi zwa vhudavhidzani.
Muimbi we a wina pfufho o vhuyelela kha X na tshitatamennde tshilapfu tshe a bvisela khagala ndivho dzawe, a tshi ombedzela uri ho ngo vhuya a ṱoḓa u sinyusa muthu.
Uri post yawe yo fhiraho yo vha yo ṱuṱuwedzwa nga mbilaelo nga ha nḓila ine vhaṅwe vhathu vha Afrika Tshipembe vha farwa ngayo nga ṅwambo wa nyambo dzine vha dzi amba.
Makhadzi o ṱalutshedza uri a nga vha a songo ḓiṱahisa zwavhuḓi nahone u tenda uri luambo lwa tshiisimane tshiṅwe tshifhinga lu ita uri a konḓelwe u amba mihumbulo yawe nga nḓila ine a toda u i bvisela ngayo khagala.
“Vhafunwa vhanga vha Afrika Tshipembe, ndi tama u bvisela khagala uri a thi rapolotiki nahone ndi nga vha ndi songo amba muhumbulo wanga nga nḓila yavhuḓi ngauri Luisimane tshiṅwe tshifhinga ndi thaidzo kha nṋe. Fhedzi ndi khou humbela pfarelo vhukuma kha vhe vha kwamea nga post yanga yo fhiraho,” o ṅwala.
Muimbi uyu o bebwaho Limpopo o amba uri mbilaelo dzawe dzi bva kha vidio dzine dza khou phaḓalala kha inthanethe dzine khadzo hu pfi vhathu vhane vha amba Tshivenḓa vha vhudziswa nga ha lushaka lwavho kana vha humbelwa uri vha sumbedze uri ndi vhadzulapo vha Afrika Tshipembe.
Uya nga ha Makhadzi, vidio ya zwenezwino ine ya sumbedza munna ane a amba tshivenda a tshi khou humbelwa uri a ḓiṱaluse yo mu vhilaedzisa nga maanḓa nahone ya ita uri a ambe nga hazwo.
“Ndo ita post yanga yo fhiraho ngauri ndo vha ndi tshi khou vhilaedziswa nga vhunzhi ha dzi video dzine ra dzi vhona kha inthanethe, uri musi u tshi khou amba tshivenda vhunzhi havho vha swika vha tshi timatima uri u mudzulapo wa Afrika Tshipembe,” vho ṱalutshedza.
- VHALANI HAFHU: Anele Mdoda o netshedza thikhithi dzawe dza Boyz II Men
Vho engedza nga uri vho wana zwi tshi vhilaedzisa uri vhaṅwe vhathu vha vhonala vha sa ḓivhi luambo lwa tshivenda na tshitsonga, zwine nga zwiṅwe zwifhinga zwa nga ita uri hu humbulwe uri vhaambi ndi vhatsinda.