Khudano ya Broos na Orlando Pirates malugana na Mbokazi
Mugudisi wa Bafana Bafana Vho-Hugo Broos vho dovha hafhu u vusa vhuleme havho na tshigwada tsha Orlando Pirates.
Mugudisi wa Belgium o pomoka tshigwada tsha Soweto uri tshi khou ṱuṱuwedza Mbekezeli Mbokazi.
O vha a tshi khou gungula nga zwe zwa itea phanḓa ha musi Bafana i sa athu u fhedza u gudisa kha he vha vha vha tshi khou ḓilugisela mitambo ya Africa Cup of Nations.
U amba uri Pirates yo vha yo sinyuwa na u dinalea nga ha u sa swika ha Mbokazi nga tshifhinga nṱhani ha u mu kaidza nga zwe a ita.
Broos u khou tou vula heyi mbonzhe musi thimu ya lushaka i tshi khou ṱangana musi i tshi khou lugisela mitambo ya vhukonani na Panama.
Mbokazi — ane zwino a khou tamba kha Chicago Fire kha ḽa US — o vhuyelela gammbani nga murahu ha tshifhinga tshilapfu a siho.
Vho-Broos vho shumisa tshikhala tshenetsho u dovha vha amba nga ha u sa takalela havho zwiitea zwo livhaho kha Afcon.
Nga hetsho tshifhinga, Hugo Broos o ri Orlando Pirates yo lingedza u tsireledza muswa uyu.
Broos o vha a songo takala nga mulaedza we a u wana kha Bucs a tshi khou talutshedza uri ndi ngani mutambi wa minwaha ya 21 o sala musi bufho lawe li tshi vhuya.
“Mbokazi o swika nga murahu ha ḓuvha ḽithihi,” Broos o ralo nga Musumbuluwo.
“Ndo wana mulaedza u bvaho kha Pirates uri u dzula fhethu hune zwiendedzi a zwi wanali nga u ṱavhanya.”
O tenda uri u takuwa ha Mbokazi zwo ita uri a pfe unga zwino a nga ‘dzhia tsheo ya uri u ḓo ḓa lini gammbani’.
O sasaladza Buccaneers nga u sa vhudza mutambi uri, ‘Hai, u khou ita phoswo zwino’.
“Ndi zwine vhatambi vhaswa vha zwi ṱoḓa,” ho engedza Broos. “Ni songo mu imelela musi a tshi ita phoswo – mu vhudzeni ngoho.”