Mugudisi wa Pirates vho sasaladza vhatikedzi vha si vha vhukuma
Mugudisi wa tshigwada tsha Orlando Pirates Vho Abdeslam Ouaddou vho sasaladza vhatikedzi vha tshigwada nga u sa fara zwavhuḓi vhatambi vhavho.
Buccaneers yo kunda nga TS Galaxy nga 6-0 kha mutambo wa Betway Premiership tshitediamu tsha Mbombela nga Swondaha.
Musi vha tshi amba nga murahu ha mutambo, Vho-Ouaddou vho eletshedza uri vhatambi vho vhofholowa ndi ngazwo vho wana mvelelo yavhuḓi.
“Heyi ndi phindulo yavhuḓi kha vhane vha timatima vhuḓikumedzeli ha avha vhaṱhannga,” ho amba Ouaddou.
“Ndi dzulela u amba uri a hu na muthu kha thimu yashu ane a dzhena mudavhini a tshi lavhelela u kundwa kana u dirowa”
‘A si vhatikedzi vha ngoho vha Orlando Pirates’
Mugudisi wa Morocco o humbela vhatikedzi uri vha tikedze vhatambi naho mvelelo dzi si dzine vha khou toda.
“Vhanwe vhathu vha tea u pfesesa uri avha vhatambi vha khou shuma vho ḓi funga kha heyi thimu,” ho engedza Ouaddou.
“Na zwine ra zwi ṱoḓa khavho zwo leluwa… Ṋamusi ro kora zwikoro zwa rathi ngauri ro vha na thikhedzo i sa tendisei kha vhatikedzi vha vhukuma.
“Tshifhinga tshoṱhe musi ri tshi ḓa kha ino ḓorobo, ri wana thikhedzo yavhuḓi.Tshifhinga tshoṱhe musi ri Durban, ri wana thikhedzo yavhuḓi.
“Na vhatambi vha a zwipfa hezwo. Mashudu mavhi (ngei Orlando) arali wa xelelwa nga tshikoro kana u sa tamba zwavhuḓi, vhathu vha a sema vhatambi.
“Vhenevho a si vhatikedzi vha vhukuma.No zwi vhona hafha uri vhatambi vha tamba hani musi vhathu vha tshi tikedza thimu zwa vhukuma.
“Ri fhululedza vhatukana namusi. Ro rumela mulaedza wo khwathaho wa uri a zwo ngo fhela kha rine. Ri do lwa u swika mafheleloni.”
U kunda uhu ho vhuisa Orlando Pirates kha vhuimo ha nṱha kha ḽogo ya Betway.
Fhedzi-ha, vha murahu ha Mamelodi Sundowns nga point nthihi musi mutambo u tshi kha ḓi vha hone.