Doctor Khumalo zwino ndi Dokotela wa vhukuma 

Tshwane University of Technology (TUT) i ḓo hulisa muḓivhalea wa bola ya milenzhe wa Afrika Tshipembe Vho Theophilus Doctor Khumalo nga vhudokotela.

Hezwi ndi tshipiḓa tsha u dzhiela nṱha u shela mulenzhe hawe ha nṱhesa kha mitambo na mveledziso ya shango.

Vho Khumalo vha ḓo ṋewa pfufho ya DDoctor of Philosophy in Science (Kinesiology and Coaching Science) honoris causa from the Faculty of Sciences nga Ḽavhuṋa, ḽa 30 Lambamai.

Vha vhukati ha vhararu vha Afrika Tshipembe vhane vha ḓo huliswa nga yunivesithi.

Vha ḓo huliswa khathihi na ramabindu wa migodi Vho Daphne Mashile-Nkosi na murangaphanḓa wa mabindu Vho Paul Mpho Makwana.

Doctor Khumalo o bebwa Soweto nga dzi 26 dza Fulwi 1967, nahone lwendo lwawe lwa bola ya milenzhe lwo vha lu khagala u bva mathomoni.

Dokotela Khumalo o thoma mushumo wawe tshikoloni tsha nṱha tsha Daliwonga ngei Dube, he vhukoni hawe ho khetheaho ha ita uri a vhidzwe nga madzina a u ḓivhiwa sa “Vula-Vala” na “16V”.

Vhukoni hawe ha bola ya milenzhe ho isa phanḓa na u vha muṅwe wa vhatambi vha vhukati vha khwine kha ḓivhazwakale ya Bafana Bafana.

TUT yo ṱalusa ṱhonifho ya vhudokotela sa iṅwe ya ṱhonifho ya nṱhesa ya zwa pfunzo ine ya ṋewa vhathu vhane mushumo wavho wa vha na mvelelo dzi fhiraho sia ḽavho.

• VHALANI HAFHU:  Cardoso o tenda uri vho tamba nga tshikhala 

Kha Doctor Khumalo, u huliswa hu khwaṱhisa phaṱhutshedzo ye vhabebi vhawe vha mu ṋea musi vha tshi mu ṋea dzina.