Ouaddou o amba nga ha vhatambi vho huvhalaho kha Pirates
Mugudisi wa Orlando Pirates Vho-Abdeslam Ouaddou vho ṋea mafhungo avhuḓi nga ha vhatambi vho huvhalaho kha tshigwada tshavho.
Fhedzi zwi timatimisi uri avha vhavhili vha do dovha vha tamba kha ino khalanwaha.
Musi ho sala mitambo ya sumbe kha ino khalanwaha, vhothe Tapelo Xoki na Sihle Nduli vha kha di vha nnḓa nga nṱhani ha mafuvhalo.
Nduli o fhedzisela u tamba nga nwedzi wa Lara 2025 nga murahu ha u huvhala vhukuma mulenzhe musi a tshi tamba na Golden Arrows kha mutambo wa Betway Premiership.
Xoki ene o vha o no vha nnḓa lwa tshifhinga tshilapfu. Mutambi wa minwaha ya 31 o fhedzisela u vhonala mudavhini nga shundunthule 2025.
O vha a tshi kha ḓi tou bva u fhola kha vhulwadze musi a tshi dzhena kha khombo i ofhisaho ye ya katela Abdeslam Ouaddou na mugudisi wa vhalindavhuno vho Tyron Damons.
“Vha khou tshimbila zwavhudi.Nduli u kha mbekanyamushumo ya u vusuludzwa zwino,” Abdeslam Ouaddou o amba ino vhege.
“Ndi zwa ndeme vhukuma u dzula tsini na vhatambi vha re kha nyimele iyi.A si ene fhedzi, na Tapelo… vhoṱhe vha khou tshimbila zwavhuḓi.”
Mugudisi o engedza nga uri vhatambi vhothe vho no thoma u vhuyelela mudavhini, fhedzi o sevha uri vha songo ṱavhanya u vhuyelela.
- VHALANI HAFHU: Vha Emtee Records vho fhelisa vhushaka na murepa Zae
“Vha nḓilani ya u fhola, fhedzi a thi na vhutanzi arali ri tshi ḓo vha vhona musi khalanwaha i sa athu fhela.
“Tshithu tsha ndeme vhukuma ndi u vhona uri u fhola havho ndi havhuḓi nga hune zwa konadzea ngaho u itela uri vha vhuye vho khwaṱha,” ho engedza mugudisi wa Morocco.