Edwin Gymah o amba nga ha thaidzo dzine a khou tangana nadzo

Edwin Gymah o amba nga ha thaidzo dzi tshuwisaho dzine a khou tangana nadzo.

Mutsireledzi uyu ane a ḓivhelwa vhukoni hawe vhu songo ḓoweleaho ha u kora zwikoro, o bvisela khagala uri muṱa wawe wo shela mulenzhe kha u wa hawe.

Musi a tshi khou amba na Oyerepa Afutuo Radio kha shangoni ḽa hawe ḽa Ghana, Gymah o ṱalutshedza nga vhuḓalo nḓila ye vhutshilo hawe ha shanduka ngayo.

O amba uri zwithu zwo thoma u mu vhifhela nga murahu ha u ṱangana na mulanguli wawe wa kale.

O pomoka mulanguli wawe uri o tshinya tshifanyiso tshawe khagala, zwe zwa thithisa tshikhala tshawe tsha u wana zwigwada zwine a nga tamba khazwo.

“Nga tshifhinga tsha mushumo wanga, ndo ṱutshela zwoṱhe u itela u thusa muṱa wanga, zwihuluhulu mme anga na vhana vha hashu.

“Fhedzi nga murahu ha u fhambana na mulanguli wanga, zwithu zwoṱhe zwo shanduka,” Gymah o ralo.

Uya nga ha ene, nyimele yo mbo ḓi fhira bola ya milenzhe, ya kwama vhutshilo hawe ha muthu nga eṱhe.

“Vhushaka hanga ho vha ho thithisea. Vhalanguli vhanga, khonani, vhashumisani — na muṱa wanga — vho nṱutshela. Nḓowetshumo yoṱhe ya bola ya milenzhe yo nṱutshela,” o engedza nga u ralo.

Mutambi wa minwaha ya 35 o pomoka khaladzi awe uri o mu fhura uri a bve nḓuni yawe musi a tshi khou tamba nnḓa ha shango.

“Musi ndi Afrika Tshipembe, khaladzi anga o nkhumbela uri ndi fhirisele vhuṋe ha nnḓu yanga khae nga GHS25 000 (ine ya ṱoḓa u vha R37 000), ye nga murahu a i engedza ya vha GHS50 000 (ine ya ṱoḓa u vha R75 000).

“Musi ndi tshi vhuyelela Ghana, ndo wana uri nnḓu yanga yo dzhiiwa, a i tsha vha yanga,” Gymah o ṱalutshedza.

• VHALANI HAFHU : Andile Mpisane o pomokwa u rwa mufumakadzi

Hu pfi nyimele iyi yo sia Edwin Gymah na muta wawe vhe kha nyimele i vhavhaho vhukuma sa izwi vha si na na fhethu ha u dzula.