Andile Mpisane o pomokwa u rwa mufumakadzi

Mutambi wa kale wa PSL na mudzulatshidulo wa kilabu Vho-Andile Mpisane vho ṋea muḓivhalea wa kha zwileludzi zwa vhudavhidzani  Vho-Inno Morolong awara dza 24 uri vha humbele pfarelo.

U dovha a ṱoḓa uri mufumakadzi uyu a bvise mavharivhari a uri o mu rwa nightclub ya Sandton mathomoni a vhege ino.

Ḓuvha ḽa u fhedzisela, ḽe ḽa bviswa nga tshigwada tsha zwa mulayo tsha Andile Mpisane, ḽi tevhela tshitatamennde kha Instagram ya Morolong.

Fhedzi ubva tsheetsho mufumakadzi o mbo ḓi bvisa zwe a ṅwala nga ha u rwiwa ha vhathu ngei Booth Nightclub.

Vho-Morolong vhari tshiwo itshi tsho bva kha khanedzano vhukati havho, vhari Mpisane o sema mme awe vho lovhaho, vhe vha vha vha tshi kha di tou bva u vha vhulunga nga murahu ha u lwa na vhulwadze ha cancer.

“Ndo rwiwa  nda vha na dzungu… Nda humbula uri ndi hone ndo fa,” hu vhigwa uri Morolong o amba nga u ralo.

O isa phanda na u pomoka uri Andile Mpisane na tshigwada tshawe ndi vhone vhe vha mu rwa sa vhunga vha tshi khou rwa tshigevhenga, tshe vha tshi fara tshi khou tswa.

Mulandu wa u rwa wo vulwa tshiṱitshini tsha mapholisa tsha Sandton, nahone vhahulwane vho khwaṱhisedza uri ṱhoḓisiso dzi khou bvela phanḓa.

Fhedzi-ha, Mpisane o hanedza nga maanḓa mavharivhari aya, a ḓifhambanya na khanedzano kana u rwiwa huṅwe na huṅwe.

Uya nga ha ramilayo wawe, muthannga wa minwaha ya 25, nwana wa ramabindu Shauwn Mkhize, o vha e mueni o khetheaho hanefho fhethu.

Ramilayo o isa phanda na u amba uri arali hu na muthu we a rwiwa, ndi nga vhashumi vha tsireledzo vha nightclub.

“Muthu washu o vha a songo dzhenelela kha u rwa naho hufhio. Mavharivhari aya ndi mazwifhi nahone a tshinya dzina,” ho amba tshigwada tshawe tsha zwa mulayo.

• VHALANI HAFHU : Shamiso u pembelela muṅwe ṅwaha kha YFM

Tsedzuluso ya mapholisa i khou bvela phanḓa, nahone a hu athu bviswa zwifanyiso zwa CCTV — zwifanyiso zwine Morolong a kombetshedza uri zwi ḓo tikedza mavharivhari awe.