DJ Tira u toda hu tshi bvisiwa mafhungo ane a mu tshinya dzina

Mubveledzi wa muzika we a wina pfufho na muhulwane wa Afrotainment DJ Tira vho bvisa ngeletshedzo ya mulayo kha muṱalutshedzi wa zwa vhuḓimvumvusi na Ramiswaswo Sandile “Flymotion” Makhanya.

Vha tshi ṱoḓa uri a humisele murahu maipfi e a a amba nga tshifhinga tsha nyambedzano kha podcast ya zwenezwino.

Kha vhurifhi ha ṱhoḓea ha ḽa 23 Fulwana, vhaimeleli vha Tira vha ri Makhanya o amba mazwifhi na u tshinya dzina musi a tshi bvelela kha On Point With Sandy Nene Season 2, zwe zwa tshinyadza bvumo ḽa muimbi.

Vho Ramilayo vhari zwe Makhanya a amba zwo vha zwi tshi khou amba uri Tira o tambudza vhaimbi vho sainaho na Afrotainment na u mu ṱumanya na vhugevhenga na vhuḓifari vhu si havhuḓi a sa ṋei vhuṱanzi.

Vha dovha vha hanedza na maambiwa ane a khou sumbedza uri Afrotainment yo vha i sa tsha shuma.

Uya nga ha tshigwada tsha zwa mulayo, tshitatamennde tshi nga vhaisa vhushaka ha Tira na vhaimbi, vhatikedzi, vhashumisani vha mabindu na tshitshavha, ngeno zwi tshi khou mu vhea kha u xelelwa nga masheleni. 

Vhurifhi vhu ṱoḓa uri Makhanya a litshe u dovholola zwine a khou amba, a bvise zwe zwa rekhodiwa kana zwe zwa ṅwalwa kha zwileludzi zwa vhudavhidzani zwo no yelana na haya mafhungo. 

Vho Ramilayo vha Tira vho sevha uri hu do tevhela vhukando ha mulayo arali Makhanya a kundelwa u tevhedza.

• VHALANI HAFHU : Pirates yo ḓivhadza lwa tshiofisi u saina mutambi wa Stellies 

Nga tshifhinga tsha u ganḓiswa, Makhanya o vha a sa athu fhindula khagala vhurifhi uho.