Bomb Productions yo bva mulomo kha mafhungo a Nirvana Nokwe

Vha khamphani ya Bomb Production yo bvisa tshitatamennde tsha u fhindula mbilaelo ya u tambudzwa lwa vhudzekani nga Nirvana Nokwe

Vha Bomb Productions vho fhedza vho tandulula mavharivhari a u tambudzwa lwa vhudzekani o itwaho nga mutambi wa matambwa na muimbi Vho-Nirvana Nokwe kha mutambi ngae wa Red Ink Vho-Bonko Khoza.

Khamphani ya u bveledza yo bvisa tshitatamennde tshilapfu tsha tshitshavha nga Ḽavhuraru, ḽa 20 shundunthule 2026.

Kha tshitatamennde tshavho, vha Bomb Productions vho ombedzela uri a vha imi na u tambudzwa ha mufuda ufhio na ufhio nahone vha ri mavharivhari aya o dzhiiwa nga u ṱavhanya u bva tshe a ambiwa.

Uya nga vha nnḓu ya u bveledza, ṱhoḓisiso dza nga ngomu dze dza tevhela a dzo ngo kona u khwaṱhisedza mavharivhari nga ṅwambo wa u shaya vhuṱanzi ho linganaho.

“Ṱhoḓisiso yo fhela hu si na vhuṱanzi ho eḓanaho ha u khwaṱhisedza mavharivhari.”

Bomb Productions yo dovha ya dzumbulula uri vhoṱhe Nokwe-Mseleku na Khoza vho vhudzwa nga ha mvelelo na u eletshedzwa nga ha nḓila dzo engedzeaho dzine vha nga dzi tevhela arali vha sa takaleli mawanwa.

Vha Bomb Productions vho amba uri vhatambi vhenevho vhavhili vho vha vho no vhudzwa hu tshee nga phanḓa nga ha lushaka na vhuhali ha tshiṱori musi vha sa athu saina thendelano.

Uya nga ha tshitatamennde, muofisiri wa tsireledzo o vha e hone kha set nahone vhatambi vhothe vho humbudzwa uri vha na pfanelo ya u imisa sethe kana u vhidza uri hu ime u filimiwa arali vha sa ḓigeḓi nga tshifhinga tshiṅwe na tshiṅwe.

Vha Bomb Productions vhari ho tevhela miṱangano na nyambedzano dzo vhalaho, ho katelwa vhabveledzi, vhalanguli na miraḓo ya ndeme ya tshigwada vhe vha vha vhe hone musi hu tshi khou filimiwa.

Tshitatamennde tsho dovha tsha bvisela khagala uri hu pfi Nokwe-Mseleku o humbela vhurifhi ha pfarelo ha fomala u bva kha Khoza nga tshifhinga tsha nyambedzano dzo ṱanganaho na mafhungo aya.

Fhedzi hu pfi mutambi uyu o hana.