Ouaddou o amzwine zwa khou mu vhilaedzisa nga ha Pirates
Mugudisi wa Orlando Pirates Vho-Abdeslam Ouaddou vho sumbedza mbilaelo dzavho nga ha thimu yavho nga murahu ha musi vho no tamba mitambo ya u thoma rangela khalanwaha ngei Spain.
O amba uri u khou vhilaedziswa nga nḓila ye thimu yawe ya ṋea ngayo zwikoro zwinzhi nga tshifhinga tsha fulo lavho.
Buccaneers yo fhedza lwendo lwayo nga u kundwa nga Neom FC nga 1-0 nga Lavhutanu.
Pirates yo ya Spain na vhatambi vha fhiraho 30 nga ndivho ya u ṱanganya vhatambi vhaswa, u ṋea zwikhala vhaswa na u lugisela khalanwaha ntswa.
Thimu i do vula khalanwaha ya Betway Premiership nga mutambo na Milford mafheloni a vhege i daho.
Kha mitambo miṋa ngei Spain, Orlando Pirates yo dzhia zwikoro zwa rathi fhedzi ya dovha ya ṋea zwikoro zwa rathi, zwe Abdeslam Ouaddou a zwi lila.
Ouaddou o ri: “Ndi humbula uri lwendo lwoṱhe lwo vha lwo bvelela malugana na zwine ra ṱoḓa u zwi swikelela.”
“Ro ḓa fhano u fhaṱa vhuthihi kha thimu, u ṱanganya vhaswa na vhatambi vhaṱuku, na u isa phanḓa na ndugiselo dza khalanwaha.
“Ro fhedza luṱa lwa vhuraru lwa u lugisela, nahone vhege iḓaho ri ḓo dzhena kha luṱa lwa vhuṋa u itela u lugisela mutambo wa u thoma wa ligi.”
Vho amba uri vhunzhi ha vhatambi vho vha na tshifhinga tsha u tamba nahone vho swika kha vhuimo ho teaho ha u khwaṱha ha muvhili.
Mugudisi o bebwaho Morocco o tenda a ri: “Naho zwo ralo, hu na tshithu tshithihi tshine nda sa tshi takalele.”
“Ro ṋea zwikoro zwinzhi vhukuma. Zwenezwo zwi a ri vhilaedzisa ngauri khalanwaha yo fhiraho ro vha ro khwaṱha vhukuma murahu. Ri fanela u zwi lugisa nga u ṱavhanya.”
- VHALANI HAFHU : Sdumo Mtshali ndi muambasada muswa wa Madza SA
Abdeslam Ouaddou u do vha fhasi ha mutsiko wa u isa phanda na fomo yawe ya vhudi sa izwi Orlando Pirates yo wina zwiphuga zwiraru kha khalanwaha yawe ya u thoma.