Zwane o bvisela khagala tshiitisi tsha u dzula kha AmaZulu 

Mugudisi wa AmaZulu FC Vho-Arthur Zwane vho bvela khagala nga ha tsheo yavho ya u dzula kha Osuthu naho dzi kilaba dzi tshi khou vha toda dza muholo wa khwine.

Zwane uri o dzhia tsheo ya u dzula ngauri u tenda kha mushumo we a fhiwa kha AmaZulu nahone ha todi u litsha mushumo wawe nga nṱhani ha tshelede.

Naho a songo bvisela khagala madzina a zwigwada zwine zwa vha na dzangalelo khae, uri mafhungo o raloho o ḓowelea musi khalanwaha i tshi fhela.

Fhedzi mivhigo yo vha yo no sumbedza uri Zwane o vha a tshi khou ṱoḓiwa nga vha Sekhukhune United musi vha sa athu thola Cedric Kaze.

O amba uri mafhungo a u ṱuwa ha mugudisi kana vhatambi ndi tshipiḓa tsha bola ya milenzhe.

Arthur Zwane o amba uri ene, mudzulatshidulo, bodo na CEO vho vha vhe khagala uri pulane ya kilabu ndi ifhio.

“Ndi ngazwo hu si na muthu we a vha a tshi khou vhilaela uri ndi ḓo ṱuwa,” o ralo.

Mugudisi o amba uri mushumo wa AmaZulu ndi wa ndeme vhukuma khae.

O amba uri ndi yone ye ya mufha tshikhala tsha u ṱutshela Kaizer Chiefs, he a shuma hone lwa miṅwaha minzhi.

“Ndi nga si i laṱe ngauri vhathu vho amba zwavhuḓi nga ha nṋe,” ho amba Zwane.

O amba uri u bva tshe a tamba bola, ha athu vhuya a gidimela tshelede e eṱhe. O amba uri ndi kale o farelela kha zwine a tenda khazwo.

•  VHALANI HAFHU: Kaze o amba nga ha u sa ṱhonifhiwa musi a tshe kha Chiefs 

“Muya wanga u kha di ri ndo luga ndi hanefha. A thi nga litshi,” ndi Zwane a tshi phetha.