Zwi tovha malofhani u raha shotho kha Mbekezeli Mbokazi
Naa Mbekezeli Mbokazi u fhedza tshifhinga tshingafhani a tshi khou guda u raha shotho a kule?
Ndi mbudziso ye ya vhudziswa mutambi wa Bafana Bafana nga murahu ha tshikoro tshawe tshi mangadzaho musi a tshi tamba na Panama nga Lavhuvhili vhusiku.
Naho tshikoro tshawe tshi bvaho nnḓa ha bogisi tsho takadza vhatikedzi, mvelelo yo vha i si yavhuḓi.
Bafana yo fhedza yo kundwa nga 2-1 kha mutambo wa DHL stadium Cape Town.
“Ndi kha ḓi kona u raha shotho naho ndi gym,” ho amba Mbekezeli Mbokazi nga murahu ha mutambo.
“Ndi nga si ambe uri ndi fhedza tshifhinga tshinzhi ndi tshi khou i ta ndowendowe.
“Fhedzi musi tshikhala tshi tshi ḓa, ndi a zwi vhona, ndi takalela u raha,” ho ṱalutshedza mutsireledzi wa Chicago Fire.
Mbekezeli Mbokazi o vha a tshi khou tamba Afrika Tshipembe lwa u tou thoma u bva tshe a dzhena kha thimu ya ligi khulwane ya Amerika.
“Ndi a takala u vha fhano na vhatambi avha vhe nda fhedzisela u tamba navho,” o amba nga ha u vhuyelela kha Bafana.
“Zwenezwo zwi nṱuṱuwedza uri ndi bvele phanḓa ndi tshi shuma ngauri hu kha ḓi vha na tshibuli tsha uri ndi bvele phanḓa ndi tshi tamba navho.”
Naho Bafana yo kundwa, Mbekezeli Mbokazi uri mvelelo yo thusa u vha humbudza uri vha kha ḓi tea u shuma nga maanḓa.
- VHALANI HAFHU: Panama yo kunda Bafana Bafana Cape Town
“Ro tamba zwavhuḓi vhukuma.U shumisana ndi zwone zwo ri thusaho fhano nahone u kundwa a zwi ambi uri ro fhedza.