Broos kha Goss: ‘Ndi mutambi wa Bafana o fhelelaho’

Mugudisi wa Bafana Bafana Vho-Hugo Broos vho bvisela khagala zwiitisi zwa vhukuma zwa u kombetshedza havho u nanga Ricardo Goss kha thimu yavho.

Ho no vhuya ha vha na mbilaelo dza uri mutsireledzi wa Siwelele ha ngo vha kha fomo, fhedzi u dzulela u vha kha thimu ya lushaka.

Fhedzi u tamba hawe zwenezwino musi vha tshi tamba na Orlando Pirates kha mutambo wa Betway Premiership zwo ita uri vhanzhi vha tende uri o fanelwa nga vhuimo hawe ha Bafana.

Kha Broos naho zwo ralo, hoyu wo vha u tshi tou vha muṅwe mutambo we wa khwaṱhisedza lutendo lwawe kha mutsireledzi wa miṅwaha ya 31.

Hugo Broos uri Ricardo Goss ndi tsumbo yo fhelelaho ya zwine a zwi ṱoḓa kha mutambi wa Bafana.

Mugudisi wa Belgium uri u vha wavhuḓi kha Bafana zwi fhira u tamba mudavhini fhedzi na vhumuthu vhu a vhalea.

“Arali na amba nga ha DNA ya Bafana Bafana, ndi tsumbo yo fhelelaho yazwo,” ho amba Broos.

“U na muhumbulo wavhuḓi, ndi muthu ane a dzulela u shuma nga maanḓa na kha vhugudisi.

“Musi u tshi mu toda, u hone. Ndi munna wa vhudi kha thimu yothe – nahone hezwo ndi zwa ndeme vhukuma.”

Hugo Broos o tenda uri u tamba ha Ricardo Goss sa Munna wa Mutambo musi vha tshi tamba na Pirates zwo vha zwi tshi khou khwaṱhisedza.

Nahone ndi ngazwo zwino o mu takulela kha tsheo ya vhuvhili nga murahu ha mukapuṱeni Ronwen Williams – a tshi fhira Sipho Chaine.

Mutsireledzi wa Pirates o bviswa, ha ḓiswa Renaldo Leaner wa Sekhukhune United sa tsheo ya vhuraru kha Bafana.

• VHALANI HAFHU : Leleti Khumalo o ri vhuisa murahu tshifhingani tsha dzi 90’s

Hu khou lavhelelwa uri Hugo Broos u ḓo ṋea tshikhala Ricardo Goss na Relando Leaner kha mitambo ya vhukonani ine ya khou ḓa na Panama.