Vilakazi o bvisela khagala zwe Da Cruz a mufhulufhedzisa zwone
Muhali wa Kaizer Chiefs kha tshiphuga tsha Toyota, Mfundo Vilakazi, o bvisela khagala zwe mugudisi muswa Vho-Fernando Da Cruz vha mu vhudza zwone musi vha tshi dzhena kha thimu.
Vilakazi o vha e muhali musi Chiefs i tshi kunda Scotland FC nga 1-0 Stadium tsha Royal Bafokeng nga Swondaha.
O kora tshikoro tsha u kunda kha mutambo nahone a nangiwa sa mutambi wa khwinesa.
Mutambi uyu muswa o amba uri u fulufhelwa nga vhagudisi ndi zwone zwo mu ṱuṱuwedzaho uri a kone u tamba zwavhuḓi.
“Vhagudisi vha a nfulufhela, nahone ndi fanela u vha livhuwa nga u tamba zwavhuḓi mudavhini,” ho amba Vilakazi.
“Hetshi tshikoro tsho vha tshi tsha ndeme vhukuma ngauri tsho ri ṋea gundo nga 1-0.
“Arali ndo vha ndi songo i kora, mutambo wo vha u tshi do ya kha tshifhinga tsho engedzwaho. Ndi livhuwa vhathu vhothe vhe vha dzulela u ntikedza.”
Vilakazi uri tshikoro tsho mufha fulufhelo ḽihulwane phanḓa ha khalanwaha ntswa ya Betway Premiership.
Mfundo Vilakazi o dovha a bvisela khagala nyambedzano yo khetheaho ye a vha nayo na Fernando Da Cruz musi a tshi swika Naturena.
“Musi mugudisi a tshi swika, o mmbudza uri u khou ṱoḓa u nnyita mutambi wa khwiṋe kha ino khalanwaha,” ho amba Vilakazi.
“Zwine nda fanela u zwi ita ndi u thetshelesa ndaela dzawe dzoṱhe na u dzi shumisa mudavhini.
- VHALANI ZWINWE: Ouaddou o amba zwine zwa khou mu vhilaedzisa nga ha Pirates
“U a tenda kha nṋe, ngauralo na nṋe ndi fanela u ita zwavhuḓi.Ndi fanela u vala nḓevhe dzanga kha phosho ya nnḓa nahone nda livhisa ṱhogomelo kha u shuma nga maanḓa.”