Doctor Khumalo u vhilaela nga tsheo ya Chiefs malugana na Lilepo

Mutambi wa kale wa tshigwada tsha Kaizer Chiefs, Doctor Khumalo, o sumbedza u vhilaela nga ha tsheo ya tshigwada malugana na Glody Lilepo.

O dovha a bvisela khagala uri hu na zwo khakheaho kha u tendela Lilepo a tshi ṱuwa, sa izwi hu tshi pfala uri u tsini na u ṱuwa kha Amakhosi.

Hu khou pfala uri Chiefs yo tendelana na mbadelo ya u rengisa mutambi wa DR Congo kha kilabu dza North Africa, Raja Casablanca na Al Ahly Benghazi.

Khumalo o amba uri arali Lilepo a ṱuwa, a nga vhona zwikhala zwa khwine huṅwe fhethu.

“Arali a tuwa a nga vhona vhumatshelo ha khwine hune a khou ya hone”oralo doctor Khumalo.

Ho dovha hafhu ha bvelela mivhigo ya uri Glody lilepo ndi ene we a kombetshedza uri a bve kha tshigwada tsha Kaizer chiefs.

Mafheloni a khalanwaha yo fhelaho, o posa mulaedza wa u onesa kha zwileludzi zwa vhudavhidzani naho o vha a tshi kha ḓi vha fhasi ha thendelano na tshigwada.

O dovha a phumula zwinepe zwawe zwothe o ambara mivhala ya Chiefs kha masiaṱari awe a social media, zwa ita uri vhanzhi vha tende uri u khou ṱoḓa u ṱuwa.

“Uri Chiefs i khou mu vhofholola zwi amba uri hu nga vha na thaidzo ya nga ngomu ine ra sa i ḓivhe.

“Ndi khou ṱoḓa u tenda hezwo ngauri ndi nnyi ane a nga bvisa mutambi a ngaho ene nga hu leluwaho nga u rali?” ho isa phanḓa Dokotela Khumalo.

• VHALANI ZWINWE: Shabalala u thoma ndima ntswa na khamphani ya Puma 

Uya nga ha Dokotela Khumalo, u ṱuwa ha Glody Lilepo kha Kaizer Chiefs a si ngauri thimu i khou mu ṱoḓa, fhedzi ndi ngauri hu na zwiṅwe zwithu zwi songo bviselwaho khagala zwe zwa tutuwedza nyimele.