Petersen u ri thimu yo sedza kha u fhedza khalanwaha vha nṱha

 Mukapuṱeni wa Kaizer Chiefs Vho-Brandon Petersen vho zwi bvisela khagala uri a vha dzheneli kha mafhungo a dziṅwe thimu na nndwa dzadzo – nga maanḓa kha tshiphuga tsha Betway Premiership.

Mulindavhuno wa minwaha ya 31 u ombedzela uri thimu yawe yo sedza kha u fhedza khalanwaha nga nḓila ya nṱha.

Chiefs i do tangana na Mamelodi Sundowns stadium tsha Loftus nga Lavhuraru vhusiku kha mutambo une wa nga vha na masiandoitwa mahulwane kha mbambe ya u dzhia tshiphuga.

Arali Amakhosi ya kunda, zwi nga fhungudza luvhilo lwa Sundowns, zwa ṋea Orlando Pirates tshikhala tshavhuḓi tsha u wina tshiphuga.

Fhedzi Brandon Petersen u khwathisedza uri a si zwone zwine Kaizer Chiefs ya khou vhilaela ngazwo – vho sedza kha thaidzo dzavho.

“Kha riṋe, tshithu tsha ndeme vhukuma ndi u fhedza ri nṱha nga hune zwa konadzea ngaho.

“Zwi tou vha khagala uri ri khou ṱoḓa u vhuyelela kha bola ya milenzhe ya dzhango kha khalanwaha i ḓaho,” ho amba mulindavhuno.

Amakhosi vha khou sedza u fhedza kha zwigwada zwiraru zwa u thoma kha log. Hezwi zwi ḓo khwaṱhisedza u vhuyelela havho kha miṱaṱisano ya CAF.

“Ndivho yashu khulwane ndi u kuvhanganya phoindi nnzhi nga hune zwa konadzea ngaho na u fhedza khalanwaha ro khwaṱha.

“Ro shuma zwavhuḓi vhukuma kha ligi musi ri tshi vhambedza na khalanwaha dzo fhiraho,” ho engedza Petersen.

• VHALANI HAFHU : Gavin Hunt u fulufhela kha mutsho u itea u kunda Pirates

Sa vhunga Petersen o vhaisa Pirates kha nndwa iyi, maṱo zwino a ḓo dovha a vha khae musi Amakhosi a tshi khou ṱoḓa u ṱangana na Sundowns.