Ouaddou o vhonwa phoswo ine ya nga ita uri pirates i xelelwe nga ligi

Mutambi wa kale wa Orlando Pirates Vho-Albert “Bashin” Mahlangu vho ṱalula zwine vha tenda uri ndi vhukhakhi vhuhulwane nga mugudisi Vho-Abdeslam Ouaddou.

Thimu ya Ouaddou i kha mbambe yo khwaṱhaho na Mamelodi Sundowns ine ya khou ḓi tsireledza.

Buccaneers zwa zwino i kha vhuimo ha ntha nga 51 points kha mitambo ya 22.

Fhedzi vha khou tevhela Sundowns nga point nthihi yone i na mitambo ya 21.

Naho vho ita zwavhudi na u tamba bola ya milenzhe ya vhudi, Pirates yo vha i tshi khou tambula phanda ha tshikoro.

Thimu i bvela phanḓa na u sika zwikhala fhedzi kanzhi i kundelwa u zwi dzhenisa kha nethi.

Mahlangu u tenda uri tsheo ya u hadzima Tshegofatso Mabasa kha Stellenbosch FC nga nwedzi wa Phando yo vhaisa thimu.

“Kha nṋe, ndi vhona u nga mugudisi o ita phoswo musi a tshi vhofholola Mabasa.

“Arali ro vha ri na mutambi wa phanḓa a ngaho Mabasa, ro vha ri tshi ḓo vha khwine vhukuma zwino,” Mahlangu o amba kha Podcast ya Soccerbeat.

“Arali na sedza zwikhala zwe ra zwi sika fhedzi ra kundelwa u kora , Mabasa o vha a tshi ḓo vha o ita khwine ngazwo.”

U bva tshe Mabasa a ṱuwa, Vho-Ouaddou vho ḓitika nga Yanela Mbuthuma na Vhuṱanzi Makgopa.

Fhedzi vhuvhili havho vho sedzana na u sasaladzwa nga vhatikedzi nga u xelelwa nga zwikhala zwo leluwaho.

“A thi khou amba uri Mbuthuma na Makgopa a si vhavhuḓi, fhedzi mutambi muṅwe na muṅwe u na tshitaila tshawe,” ho isa phanḓa Mahlangu.

• VHALANI HAFHU: Panama yo kunda Bafana Bafana Cape Town

“Mabasa o vha a tshi nga dzhia zwiṅwe zwa zwenezwo zwikhala, nahone ro vha ri tshi ḓo vha ri kule u bva zwino.”