Ouaddou u na fulufhelo kha vhatambi vha bvaho kha youth academy

Mugudisi wa thimu ya Orlando pirates Vho-Abdeslam Ouaddou vhari vhatambi vhararu vhane vha kha di tou bva u huliswa kha thimu khulwane vha na vhumatshelo havhudi.

U amba uri hezwi zwi ḓo itea fhedzi arali vho ḓiimisela u guda sa izwi zwino vha kha thimu ya vhahulwane ya tshiimo tsha nṱha vhukuma.

Pirates yo ḓiitela dzina nga u ṱuṱuwedza vhatambi vha bvaho kha youth academy yavho vhe vha ḓiitela dzina kha thimu ya vhahulwane.

Kha vhe vha ḓiitela dzina ndi Relebohile Mofokeng, Mohau Nkota na Mbekezeli Mbokazi, vhane zwazwino vha khou tamba kha thimu dza nnḓa ha shango.

Orlando pirates yo ḓisa vhatambi vhararu u bva kha thimu yo winaho DStv Diski Challenge vhane zwazwino vha khou shuma fhasi ha Abdeslam Ouaddou.

Christian Derbyshire, Siphiwe Masilela na Mpho “Phopho” Padime zwa zwino vha kha gammba ya u thoma ya khalanwaha ya thimu ngei Spain.

Vhothe avha vhatambi vho wana tshikhala kha mutambo wa vhukonani musi Pirates i tshi tamba 1-1 na Córdoba CF nga Lavhuraru.

Musi vha tshi khou amba na mutambi wa kale wa Bucs Michael Morton, Vho-Ouaddou vho amba uri u bvelela ha vhatambi vhaṱuku ndi tshipiḓa tsha mvelele ya thimu.

“Pirates i ḓivhelwa u ṋea tshikhala vhatambi vhaṱuku.Hezwo ro zwi vhona kha Nkota, Mofokeng na Mbokazi.

Mugudisi o bebwaho Morocco o ri: “Ri dovha ra ṱoḓa u isa phanḓa na yeneyo mvelele.”

O amba uri vhatambi vhoṱhe vhararu vho mu takadza nahone o sumbedza u vha fulufhela vhukuma.

• VHALANI HAFHU :Makgopa na Mabasa vha khou todiwa Turkey

Vho-Abdeslam Ouaddou vhari havha vhatambi vha na vhukoni hothe ha u bvelela kha thimu khulwane ya Orlando pirates.